Vawiin chawhnu khan H&TE Minister Pu R. Romawia, UD&PA Minister Pu Zodintluanga leh H&FW Minister Pu Lal Thanzara te chuan Mizoram University (MZU)-ah Department of Management, Health Centre leh School of Education & Humanities building thar te an hawng.
Building thar hawnna neih zawhah hian Department of Management-a Video Conference Hall-ah programme neih chhunzawm a ni a. MZU Registrar Pu C. Zothankhuma’n programme kaihruaiin, MZU Vice Chancellor Prof. R. Lalthantluanga’n inlawmna thu a sawi.
Pu R. Romawia chuan tunlai khawvel inelna sang tak karah management fel tak tel lo chuan hma sawn a har a. Mahni eizawnnaa hlawhtling tur chuan management kan thiam hle a ngai a ni, a ti. Vice Chancellor, Registrar leh mi dangte thawh hona tha avanga zirna infrastructure tha an nei thei chu lawmawm a tih thu a sawi bawk. Zirna boruak muanawm tak chu vawng nung zel a, University chu politics lam rawng kaia hmang lo turin a chah nghal a ni.
Pu Zodintluanga chuan hmasawnna ruhrel tha tel lova hma sawn a har thu sawiin, Mizoramin India rama football kan champion-pui theih chhan pawh infiamna lama hmasawnna ruhrel tha kan duan vang a ni, a ti a. Zirlaite chu an vanneihzia hria a, an tana remchang chu bawhpelh lo turin a fuih a. Zirtirtute pawh lehkhabu chhunga mi chauh duh tawk lo va, an zirlaite chu khawi hmunah pawh dingchhuak thei tura zirtir thiam turin a chah bawk.
Pu Lal Thanzara chuan hriselna lama infrastructure tha leh doctor thiam leh staff tha tak an nei chu lawmawm a ti a. Harsatna an tawh chang pawhin inthlahrung lova amah pun thin turin a chah. Zirlaite chu ram leh hnam tana thawktu bakah, University vekah pawh zirtitute an la nih dawn avangin tih tak zeta zir tura a duh thu a sawi a ni.
He hunah hian Junior Engineer Pu Lallawmzuala’n Technical Report a pe a. MZU Finance Officer Prof. Lianzela’n lawm thu sawiin programme hi a khar a ni.
Department of Management building hi square metre 4000-a zau niin, cheng vaibelchhe 9.58 sengin August ni 31, 2015 khan sak zawh a ni a. School of Education & Humanities hi square metre 3300-a zau, cheng vaibelchhe 8.35 senga March ni 3, 2015-a sak zawh niin, Health Centre hi square metre 710 a zau, cheng vaibelchhe 2.64 senga August ni 12, 2015 a sak zawh a ni thung.
