Vawiin chawhnu dar 3:30 khan Chief Minister Pu Lal Thanhawla kaihhruaiin CM Conference Hall-ah Chapchar Kut Organising Committee chuan Chapchar Kut 2016 hmandan an thlirlet a . Chapchar Kut 2016 review meeting-ah hian Organising Committee Co-Chairman, Art & Culture Minister Pu R. Romawia bakah Committee member-te an tel kim hle.

Meeting kaihruaitu Chief Minister Pu Lal Thanhawla chuan Chapchar kut chu uar deuh deuh a tul thu leh India ram mai baka khawvel hriat khawpa kut hlawhtling a nih theih nan leh khualzin hipluhna hmanraw tangkai a nih theih nan ngaihtuahna seng turin kalkhawmte chu a sawm a. Mimal thahnemngaite hnen atanga thurawn chi hrang hrang a dawn thu sawiin Chief Minister chuan rawtnat hrang hrangte chu theih ang anga enzui zel a ni ang, a ti bawk. Chief Minister chuan Tahan mite Chapchar Kut hmandan sawiin Myanmar rama Zohnahtlakte Chapchar Kut hmandan chu an Mizo hle a ni, a ti a. Tanhana chapchar kut lawmtu mipuite tanrualna leh thawhrimna fakin Pu Lal Thanhawla chuan, “Sawrkar tanpuina tel miah lova Tahan mipui tangrualin ni hnih chhung ropui taka Chapchar kut an lawm thei hi Mizoram mipuite tan entawn tur tha tak a ni,” a ti bawk.

Chapchar Kut Organising Committee Secretary Pu Lalhmachhuana chuan kumin Chapchar Kut hmandan chipchiar takin a report a. Committee member-te chuan kumin Chapchar Kut chu kum dang zawng aia hlawhtling nia an hriat thu an sawi a. Hnam thil hian mipui a tihphur theih ber avangin Chapchar Kut lawmna chu Mizo culture ziarang pholang zawng leh mipui tam thei ang ber tel theihna nan Mizo lam chi hrang hrang leh Mizo infiamna chi hrang hrangte uar zawka telh zel tha an ti tlang bawk. Industries Department hmalaknaa Food Fest an buatsaih leh Exhibition hrang hrangte chuan Kut a tihlawhtlin thu leh Security felfai taka kalpui a nih avangin Organising Committee chuan lawmthu a sawi bawk.

Kumin Chapchar Kutah hian Aizawl khawpui chhunga Branch YMA 84 atanga member 1581-ten Cheraw ropui takin an entir a. Lam chi hrang hrang leh zai bakah naupang puala hun hman a ni bawk. Chapchar kut hlawhtlin nan sawrkar leh pawl hrang hrangten nasa takin Organising Committee hmalakna tha takin an thawhpui a, Mizo thuam inbel tura ngenna phei chu a hlawhtling hle a ni. Chapchar kut lawm tur hian Shillong, Manipur, Tripura leh Haflong atangin chhimtu an lo kal a. India ram hmun danga Mizoten Chapchar Kut lawm ve an dilna pawh a tul anga bawhzui tum a ni.