Nimin ni 17.5.2016 chawhnu khan Serchhip DC Conference Hall-ah District Bawrhsap Dr. Lalrozama, IAS hovin Serchhipa Sawrkar pisa hrang hrang enkawltu (Heads of Offices) te an thukhawm a, thawhhona tha lehzual a awm theih dan tur te leh Serchhip District hmasawnna hna an thawhna kawng hrang hrang te sawihovin Department hrang hrangte an thawhho theih dan tur an sawi.

Bawrhsap chuan thla 9 Serchhip a Bawrhsap hna a thawh chhunga Serchhip a Sawrkar officer te nen thawhhona tha tak an nei chu lawmawm a tih rualin lawmthu a sawi nghal a, an thawhhona a that avangin mi ten an thlir danah pawh Serchhipa thawk officer nih hi a nuam a ni a ti a, Sawrkar Department hrang hrang enkawltute inhmuhkawma inhmelhriat tawn bakah harsatna te, mamawh te leh hmasawnna te sawihona hun tha tak an nei chuan mipuite rawng an bawl kawngah awmzia tha tak a neih ngei a beisei thu a sawi bawk.

Bawrhsap chuan Department hrang hrang ten hna tha tak thawk ni a kan inhriat lai hian mipuiten kan hnathawh an hriat siloh chuan awmzia a nei thui lo thin a, kan hnathawh te mipuite hnena kan hriattir hi kan tih ngei ngei tur pakhat anih bakah mipuite nen kan inlaichinna ah inrintawnna a siam thei bawk a a pawimawh hle a ni a ti a, an hnathawhte media kaltlanga puanzar hreh lo turin a chah a ni.

Nimin thukhawm hian thlatin Thawhlehni hmasa berah Bawrhsap hova Heads of Offices te thutkhawm ziah an rel a, NGO leh Khawtlang hruaitute nen inkawmhona hun siam an rel bakah Office tinah Fakselna Bawm (Complain/Suggestion Box) hung vek turin an rel bawk. Mipui nen in dawr tam lehzual bik Department te chu Telephone Inquiry Number dah turin an rel a, hun vawn dik kawnga tan la thar lehzual turin an infuih bawk a ni.

Bawrhsap chuan Sawrkar Flagship Programme NLUPah pawh chak taka hma thar lak a ngaih dawn thu sawiin Line Department zawng zawngte pawhin thawhhona tha lehzual an neih a pawimawh dawn a ni a ti a, he meetingah hian Department hrang hrang ten an hnathawh dan leh mamawhte an sawiho a ni.