Kolasib 19th November 2020: Vawiin chhun khan ‘World Toilet Day 2020’ pualin Department of Drinking Water and Sanitation, Ministry of Jal Shakti chuan hun a buatsaih a, Video Conference kaltlangin India ram hmun hrang hrang atangin Swacch Bharat Mission (Grameen) hnuaia hmalaknate ngaihthlak niin India rampum atanga a titha zual district 20 thlan chhuah zingah Kolasib leh Serchhip-te an tel a ni.

NIC Centre, Kolasib DC Office atangin Dr.H.Lalthlangliana, Deputy Commissioner, Er.H.Lallianmawia, Sr.EE, Member Secretary, Kolasib District SBM(G) leh PHED-a hotu dangten Kolasib District aiawhin district titha lawmpuina hi he Video conference kaltlang hian, Pu. Gajendra Singh Shekhawat, Union Minister, Ministry of Jal Shakti hnen atangin an dawng a ni. Kolasib leh Serchhip bakah hian India hmarchhak state zingah Siang district, Arunachal Pradesh-in lawmman hi an dawng ve bawk a ni. World Toilet Day 2019 hmanna ah khan Kolasib district hian India hmarchhak state zinga Swachha Bharat Mission hnuaia hmalakna tehfung hrang hrangah lawmman pakhatna a lo la tawh bawk a ni.

World Toilet Day 2020 pual a hun hmannaah hian Union Minister Pu. Gajendra Singh Shekhawat chuan faina kawng a khawtlang titha thlanchhuah 9 a an khawtlang hruaitute chu Video Conference kaltlang hian kawmna hun a hmang a. Open Defecation Free chungchangte leh Open Defecation Free Plus hnuai a hmalakna an kalpui dan leh hmalak chhunzawm an tum dan te a sawipui.

Kolasib district chhung a khua (Rural Village) 34 awm ah Community Sanitary Complex (CSC) hi PHE Department hmalaknain sak vek tawh a ni a, Lungdai leh Rengtekawnah Sanitary Complex hi pahnih ve ve sak a ni. Swacch Bharat Mission (Grameen) hnuaiah Kolasib district-ah kum 2017-2020 chhung hian mimal ek in 2,057 sak a ni a, geo-tagging tih vek a ni tawh bawk a ni. ODF Plus hnuai a hmalakna kal mekah Thingdawlah Plastic Waste Management Centre bun thuai tum a ni bawk a ni.