Nimin khan Sawrkar Laipui Ministry of Tribal Affairs-a hotulu Secretary Dr. Hrusikesh Panda chuan Aizawl a rawn thleng a. Nimin tlai dar 4:00 khan Aijal Club ah Mizoram Sawrkara Social Welfare, Education, Health, Environment & Forests, Home Department-te leh Mizoram Scholarship Board hotulu leh aiawh te nen meeting an nei a. Meeting ah hian Ministry of Tribal Affairs kaltlanga Social Welfare Department hmalakna te thlir hovin heng project kalpui meka harsatna an tawh te Department aiawh te hian an thlen a ni.

Ministry of Tribal Affairs ruahmanna in Social Welfare Department hian Eklavya Model Residential School hi Pukpui, Lunglei ah din tawhin zirlai naupang 200 vel an awm a, Serchhip District Dangzawl a pawh hetiang sikul hi sak mek a ni. Scheduled Tribe hmeichhe zirlai naupangte tan Mizoram hmun hrang hranga Hostel 15 ruahman a ni a, heng hostel thenkhat te hi sak zawh tawh niin a dang te hi sak mek a ni a. Heng bakah hian Ministry of Tribal Affairs hian Forests Rights Act 2009 kalpui dan hi a enpui a, ST zirlai tana Scholarship te pawh hi a ruahmantu a ni.

Dr. Hrusikesh Panda hian vawiin hian Lawngtlai a tlawh dawn a, ni 15.2.2015 ah Delhi panin a haw thla ang.