MHIP Sub Hqrs. Champhai in Chief Minister Pu Lal Thanhawla kaihhruai sorkarin Mizo hmeichhiate dinhmun chawikang a, inneih leh inthen chungchanga hmeichhia ten ro an khawm ve theihna tur chanvo siam sak a ‘The Mizo Marriage and Divorce Act, 2014’ Legislative Assembly a an passed thu ah lawmthu an sawi tih lantir nan vawiin khan Champhai Venglai Community Hall-ah chawimawiin thuziak (citation), ipte chei leh thangchhuah diar an hlan a ni.

Cheif Minister chuan chawimawi hi a phu berlo tih sawiin, a dan siamtu MLA mithiam rual te an chawimawi a ni a ti a. MHIP Sub Hqrs Champhai ten lawm nachang hriaa hetiang lawmna lantirna hun, sum leh pai senga an buatsaih an fakawm tak meuh a ni a ti a. Dan hi dik taka hman chuan ram leh hnam chawikangtu pawimawh tak a ni a ti a. Tuna Mizo inneih leh inthen thulha hmeichhia te tana chanvo siam hi hmeichhiate tan mai nilo, kan zavaia tana hamthatna tur leh nakin hun lokal zel tur thleng kan tangkaipui tur a ni a ti. Dan hi Pathian thu nen pawha inanna a neih thu sawiin, kan hamthatna tur bakah kan him tlanna tur a ni a, dik taka hman kan tum tur a ni a ti.

Dan passed tak hman theihna tur, a rules pawh beisei aia hmaa peihfel a ni chu a lawmawm hle a ni Pu Hawla chuan a ti a. Kan zavaia lawm tlanna leh kan hamthat tlanna tur a ni a ti a. Hmeichhiate hi chhungkua ah leh khawtlang leh kohhran thlengin an pawimawh a ni a ti a. Sorkar programme pawimawh ber NLUP hlawhtlinna ah pawh thui tak hmeichhi ten mawh an phur a ni tiin, kan sum lakluh mila khawsak thiamah te nu te hi in pawimawh hle a ni a ti.

MHIP Sub Hqrs Champhai hian Pi Lal Riliani, President, ISTH,Mizoram Chapter pawh Mizote hriselna ngaipawimawha kan hriselna tichhe theitu zuk leh hmuam dona kum 25 chuang a lokal pui tawhnaah chawimawi tlak tiin, vakiria khim tira, tawlhloh puan bih tir bawkin an chawimawi bawk a. Pi Lal Riliani chuan zuk leh hmuam dona kawnga an hmalaknaah hlawhtlinna tam tak a thawhpuite avangin hmuh chhoh mek a ni a ti a. Hmeichhiate tana Dan thar awm ta hi lawm tur kan ni tiin, lawmna lantirtu hmasa ber an ni chu an chhuanawm hle a ni a ti a. An chawimawinaah a thawhpuite an chawimawi a ni tiin, chawimawina hian chona nasa tak a siam sak a ni a ti.

Chawimawina inkhawm hi MHIP Sub Hqrs Champhai President Pi V.L.Rochhari’n a kaihruai a. Chief Minister hi Pu Lalrinmawia Ralte, Minister of State, Pu T.T.Zothansanga, Parliamentary Secretary, Pu R.Vanlalvena, MLA leh Pu T.Sangkunga, MLA & Chairman, Mizoram Youth Commission ten an tawiawm a ni.