Chief Minister Pu Lal Thanhawla'n vawiin chawhnu khan Champhai Chhangphut Field-ah Rii & Hawla Second Division Football Tournament a hawng.
Champhai District chhung Village Council hminga Football team 40 intihsiakna, Inter Village Football Tournament hawnna-ah hian Chief Minister Pu Lal Thanhawla chuan Champhai District chhungah thalai infiammi tam tak an awm thu leh chung mite chuan infiamna hmanraw tha an neih loh vanga harsatna an tawh thin thu sawiin, thalai thothang tha tak takten infiamna kawnga hma an sawn theihna tura mi thahnem ngaite ngen na anga he Rii & Hawla Football Tournament hi bultum sak ta an nih thu a sawi.
Pu Hawla chuan Mizo thalaite phur leh tui vangin infiamna kawng hrang hrangah dinhmun tha tak Mizoram in a luah chho mek tih sawiin, infiamna chu eizawnna tlak anih thu leh a bikin Football leh Criket phei chu hausakna tlam anih thu a sawi a. Mizoram State chu a tet puiah phullem phah tam ber anih thu leh Lawngtlaiah phullem phah tum mek anih thu tarlangin, 2016 a World Olympic Brazil a neih turah a tam thei ang ber Mizo thalai an tel theih nan tan lak mek anih thu a sawi. Thalaite khawvel siam tura kan hmalak mekna chu a rah kan seng mek tih tarlangin, Santosh leh National Games a Mizoram in Football a chak/thiam ber nihna a chang ta chu a lawmawm hle a ni a ti a, Infiamna a hmasawn leh hlawhtling tur chuan chhunglam leh pawnlam nun uluk atul thu sawiin, Ei leh inah fimkhur a, zuk leh hmuamah fihlim a tul a ni a ti bawk.
Rii & Hawla Football Tournament hi kum 2002 atanga tanin, kumin hi vawi 13 khelhna niin, he Tournament hi Champhai District Football Association bultum a khelh thin a ni. Champion in Cheng nuaikhat leh Trophy, Runner up in cheng singli, Semi Finalist in cheng sang nga ve ve, Fair play lawmmanin cheng singkhat a kengtel dawn a. He Tournament hi Knock out system a khelha ni.
Chief Minister hi Minister of State Pu Lalrinmawia Ralte, Parliamentary Secretary Pu T.T. Zothansanga, Mizoram Youth Commission Chairman Pu T. Sangkunga leh Champhai DC Pu H. Lalengmawia te bakah sorkar deparment hotuten an tawiawm a ni.
