Vawiin khan Sawrkar laipuia Ministry of Tribal Affairs Secretary, Dr. Hrusikesh Panda, IAS chuan zanhnih riak turin Lawngtlai a lo thleng a, a cham chhungin Lawngtlai leh Saiha District chhunga hmun thenkhat te a tlawh ang.

Chawhma dar 11:30 khan Dr. Hrusikesh Panda hi Aizawl atangin Helicopter in Lawngtlai a rawn thleng a, Helipad ah Lawngtlai Bawrhsap Pu J. Hmingthanmawia, LADC CEM Pu V. Zirsanga leh CADC CEM Pu Lila Buddha Chakma te bakah District Council pahniha Executive Member te leh Officer pawimawh ten lo dawng sawngin Chawhnu dar 1:00Pm ah DC Conference Hall ah Bawrhsap Pu J. Hmingthanmawia kaihhruaiin Meeting neih zui a ni.

Dr. Hrusikesh Panda chuan LADC leh CADC sawrkar ten harsatna a hnena an thlen te a ngaihthlak sak bakah tuna harsatna an tawh mek te chu awlsam zawk leh chak zawka sutkuak mai theih dan tur nia a hriatte a sawipui a. Hmasawnna hrang hrangte kalpui tur hian sum kan mamawh hmasa ber lem lova, a thawktute inpekna leh kan neih ang ang te dik tak leh fing taka hman chhuah hi a tul zawk a ni a ti. Lawngtlai District chu ziak leh chhiar thiam tlemna District a nih avang leh, a bikin CADC Area chu a tlem zualna a nih avangin fing taka ruahmanna siam tur leh taima taka um zui turin a ngen a ni. Chung an ruahmanna siamte chu a hnena thehlut turin a hrilh a ni.

Secretary hian NLUP Line Department te pawh an hnathawh mekte a sawipui bawk a, Ar, thlai chi, thlai tiak leh loneituten an mamawh hrang hrang Kolkata leh State dang atanga chawkluh chawp ngai hote chu siam chhuah ve tuma mahni intodelh theih dan kawng zawn zel tha a tih thu NLUP Line Department te a hrilh a ni. Ar note keutirna hmunte, Sangha chi siamchhuahna hmun te, thlai tiak siamna hmunte loneitute mamawh hrang hrangte chu intodelh tum hram turin a ngen hlawm a ni. Meeting neih zawh hian Dr Hrusikesh Panda hian Lawngtlai District Hospital leh Thingkah a Health Sub- Centre leh Primary School te a tlawh leh hnuin LADC CEM Pu V. Zirsanga’n Circuit House ah zanriah a buatsaih sak chu an kilho nghal a ni. Secretary hian naktuk ah Saiha leh Saiha District a khaw thenkhat te a tlawh kual leh ang a, Thawhtanni ah Lawngtlai District chhunga khaw thenkhat te a tlawh leh hnuin Aizawl lam a pan tawh ang. Aizawl atang hian Pi J. Vanlalrawni, Joint Director, Social Welfare Department leh Pu Vanlalrawna, OSD to Social Welfare Department ten an  tawiawm a ni.