Serchhip District Bawrhsap Office a NLUP Cell buatsaihin nimin zing dar 9:00 khan Serchhip DC Conference Hall -ah Minnesota University, USA atanga mithiam rual lo kal te leh Serchhip a khawtlang hruaitu VC, YMA, MUP leh NLUP Line Department Official te an inkawmho.

Inkawmhona hi Group thum (YMA, Village Council leh Sawrkar Official te) a inthen in neih a ni a, Group tin hi mithiam rawn kal pathum te hian an in sem a, inpawh tlang takin sawihona hun an hmang a ni.

Mithiam rual te chuan Loneitute’n rannung thahna hlo, hnim hlo leh lei tha(fertilizers) an hman dan diklo an hmuh nasat thu an sawi a, tlangram loneih mizoten bansan kan harsat chhan te an zir chiang a, NLUP kaltlanga tlangram lo neih zawi zawi a kalsan a ni mek chuan an beng a verh thu an sawi bakah Mizoram an rawn kal hma hian NLUP document te an thlir lawk vek thu te, loneitu ten harsatna chi hrang hrang an tawh te chu uluk taka zir chian a pawimawh an tih thu an sawi a, Mizoram chhunga ramngaw humhalh dan te leh tlawmngai pawl hrang hrang te hmalak dan te an zir bakah Mizoram khawtlang nunphung, ei leh bar dinhmun te hriatchian anih hnu ah kawng thar tha zawk inkawhhmuh anih theih na tur atana Food & Agriculture Organisation (FAO) in a tih ve theih tur hriatchian an tum thu an sawi a, khawtlang hruaitute pawhin Mizorama Cancer hluar chhan hi zuk leh hmuam mai bakah thildang awm tel ni a an hriat thu leh zirchian tul an tih thu te, tuihna humhalh kawnga awmze nei zawk a tan lak dan kawng zawn a tul zia te an lo sawi ve bawk a ni.

Mithiam rualte hi Serchhip District dinhmun tlangpui hrilh an nih bakah NLUP hnuaia hmalak mek anih dan te hrilh an ni a, Mithiamte chuan Mizoram University nen thawhhona thuthlung mumal tak an neih theih chuan Mizoram leilung leh loneitute harsatna te zirho a awmze nei taka hmasawnna thlen tir an beisei thu an sawi a ni.

Nimin a sap mithiam rawn kalte hi, Prof. Dr. Karlyn Eckman, Prof,. Dr. Dean Current leh Prof. Michel Sherman te an nni a, Pu C.Chawnghnuna Jt. Secy. PHED in a rawn hruai a ni.