Nimin chawhnu khan Higher & Technical Education Conference Hall-ah Education Minister Pu Lalsawta kaihhruaina hnuaiah tunlaia thalai ten ruihtheih thil a bikin damdawi an hmansual leh chhan hriat chian loh avanga Krismas leh Kumthar vuakveta thalai engemaw zat an muthlum chungchangah sawiho leh inrawnkhawmna hun neih a ni a. He hunah hian Rev. K. Lungmuana, Chairman, Mizo Moral Reformation Network International chuan hunserh hmangin Dr. Ruth Lalmuanpuii, Psychiatrist chuan sawihawnna hun a nei a. Damdawi hrang hrang thalai ten ruih nana an hmansual thin te leh heng in rilru leh taksa a nghawng dan te chipchiar takin a sawi a, a tam zawk chuan tih chak hrim hrimna rilru an put avanga damdawi hi an tih thin thu a tarlang bawk.
Pu Lalsawta chuan Mizoram chu ram pahnih leh state dangten min hual avangin thil tha aiin thil thalo a lut chak zawka tiin thalai te tan inven thiam a har a rinthu a sawi a. Tunlaia thalai muhlum hian amah pawh mimal anga a thawn hle thusawiin Sawrkar pawhin hei hi a vei a, a chan niawma lang - damdawi hmansual hi nasa leh zuala do a tul thu sawiin he thilah hian awmze nei zawka hmalak a nih theih nan leh inven dan kawngte sawihoa, rawtna leh ruahmanna tlo leh tha a taka kalpui theih tur siam a nih theih nan meeting hi koh a nih thu a sawi tel bawk a ni.
Damdawi hmansual a hlauhawm zia uar taka inzirtir leh inhrilhriat a pawimawh thu te; fate enkawlna kawnga nu leh paten an fate an thunun a tul zia thu te; zirna inah naupang kaihruaitu zirtirtu mawhphurna neih dan te leh an pawimawh zia thu te; ruihtheih thil hi naupang tam zawkin hostel atanga an chin niawma a lan avanga hostel dinhmun zirchian a tul thu te leh naupang ten rilru hahna an neih leh nun kawng diklo an zawha an mahni tanpui theitu tur consellor leh counselling pekna tur zirna inah neih a tul thu te chu sawihonaah hian thu langsar zual te chu a ni a. Heng te hi School Education Department; Higher & Technical Education Department leh SCERT-a senior officer leh Pawl hrang hrang aiawh ten zau tak leh chipchiar takin an sawiho a, rawtna engemaw zat an thlen bawk a ni.
He hunah hian School Education leh Higher & Technical Education Director ve ve te; heng Department-a senior officer te leh SCERT senior officer te bakah Mizo Moral Reformation Network International, MCTA, HISSLAM, MISSTA, MSTA, MZP leh MSU hruaitute pawh an tel a ni.
