Vawiin khan Minor Irrigation Department a hnathawk Officer-te leh Technical Staff zawng zawng te chuan infuih tharna hun hmangin, Department hmalakna te thlir hoin, Principal Accountant General, Conference Hall-ah meeting an nei a, he meeting hi Minor Irrigation changtu Minister Pu Lal Thanzara’n a telpui a ni.

Pu Lal Thanzara chuan Minor Irrigation Department chu kut hnathawktu te, loneitu leh leilet neitu te hmakhua ngaihtuahtu leh heng mite khaichhuahna tura Department pawimawh berte zing a mi a ni a, chuvangin Department-a hnathawk zawng zawng te mawhphurna chu a sang hle a nih tih hriat reng a pawimawh a ni, a ti. Sawrkar tharah rilru thar leh inpekna thar, rinawmna, dikna leh taimakna nen rim taka an hna thawk turin a fuih a, miten an sel theih loh tura an hna chu rawngbawlnaah ngai a, ram chei hna leh ram tana thawk turin a chah bawk a ni. Hna uluk a pawimawh thusawiin Minister chuan Department-a hnathawk te chu hna vil kawnga an inthlahdah a thiang lo a, hna vilna kawnga harsatna an tawk anih chuan amah hrilh thin turin a chah bawk a ni.

Minister hian khawvel huapa hming tha Japan Sawrkar hnuaia awm Japan International Cooperation Agency (JICA) thiamna leh puihna hmangin hmasawnna chungchang ‘Development and Management of Land and Water Resources for Sustainable Agriculture in Mizoram’ tih zirchhianna nei turin Minor Irrigation Department kaltlanga hma lak mek anih thu a sawi a. He hmasawnna zirchhiana in a tum ber chu kuthnathawh a lo hlawk theih nan tul zawng zawng, a tharchhuah chauh ni lovin, a thar hnua sawngbawlte leh a hralhna thleng ruahmanna siam a ni, a ti a. Hemi chungchangah hian nimin mai khan JICA aiawh te leh Vice Chairman, State Planning Board te chu an inkawm nghe nghe a, Mizoram pum huap tur Master Plan chu June 2014 ral hma hian peih hman tum a ni, a ti bawk.

Meeting thawhkhatna hi Er. Laldingliana SE (W&D) in kaihruaiin Chief Engineer Minor Irrigation Department Pu Lalthanliana chuan Department hmalakna leh hmawchhawp te a sawi langin fuihna thu a sawi. Chawhma session-ah hian Minor Irrigation hnuaia Division pali hotu ten an Division hnuaia hlawhtlinna leh hmathar an neih te an sawi bawk.

Chawhnu khan Technical session an nei a, hetah hian an hmachhawp tih hlawhtlinna tur ‘Implementation of M. I. Projects under new Accelerated Irrigation Benefits Programme Guidelines’ chungchang te, ‘Implementation of Command Area Development & Watershed Management under new guidelines chungchang te, JICA Development Study chungchangte leh Department working culture chungchangah te Department senior officer ten zirtirna pe in sawihona hun an hmang a ni.

Minor Irrigation Department hnuaiah hian Division pali – Aizawl Division, Lunglei Division, Kolasib Division leh Champhai Division te awmin hengte hi EE in an thuhchilh a, Department ah hian officer leh staff mi 230 vel an thawk mek a, an office thar tur hi New Secretariat Complex ah sak mek a ni.

Aizawl Division hian Aizawl District, Serchhip District leh Mamit District area thenkhat te huamin a hnuaia hian Sub- Division Office pahnih – Aizawl leh Serchhip te an awm a. He Division hnuaiah hian project 128 zawhfel a ni tawhin, chu chuan ram hectare 5442-a zau an tuam tawh a, kum 2013 – 2015 inkar hian ram hectare 989.40 tuamna tur project 20 atan hma la mekin hemi atana DPR chu thehlut tawh a ni.

Lunglei Division hian Lunglei, Saiha leh Lawngtlai District te bakah Autonomous District Council pathum te huamin a hnuaiah hian Sub- Division Office pali –Lunglei, Saiha, Lawngtlai leh Chawngte te an awm a. He Division hnuaia hian project 118 zawhfel a ni tawhin, chu chuan ram hectare 8848-a zau an tuam tawh a, kum 2013 – 2015 inkarah hian ram hectare 1553.26 tuamna tur project 14 atan hma la mekin hemi atana DPR chu thehlut tawh a ni.

Kolasib Division hian Kolasib District leh Mamit District area thenkhat te huamin a hnuaiah hian Sub- Division Office pahnih – Kolasib leh Zawlnuam te an awm a. He Division hnuaiah hian project 105 zawhfel a ni tawhin, chu chuan ram hectare 4824-a zau an tuam tawh a, kum 2013 – 2015 inkarah hian ram hectare 1198 tuamna tur project 19 atan hma la mekin hemi atan DPR chu thehlut tawh a ni.

Champhai Division hian Champhai District huamin a hnuaiah hian Sub- Division Office pahnih –Champhai leh Khawzawl te an awm a. He Division hnuaiah hian project 89 zawhfel a ni tawhin, chu chuan ram hectare 3628-a zau an tuam tawh a, kum 2013 – 2015 inkara hian ram hectare 776.6 tuamna tur project 13 atan hma la mekin hemi atan DPR chu thehlut tawh a ni.