Vawiin nileng khan PWD I.B, New serchhip-ah Serchhip District MJA Annual General Conference Vawi 7-na neih a ni a, Pu Andrew H. Lalremruata, MIS, DIPRO Serchhip chuan khuallian niin a hmanpui a, MJA General Headquarters atangin an President Pu C.Lalrambuatsaiha, Vice-President Pu Vanlalrema Vantawl leh hruaitu dang engemawzatin he hun hi an hmanpui bawk.

Vawiina khuallian Pu Andrew H. Lalremruata chuan chanchinbumite chu mipui ngaihah pawh mipuitling leh rintlak an nih avanga an chezia leh tawngkam chhuak thleng fimkhur turin a chah a, thuthar puanzar mai bakah khawtlang siamthat kawngahte, Sawrkar khalhngil kawngahte an mawhphurhna san zia hria a intuaihriam hreng turin a fuih a, chi leh chi, hnam leh hnam inkara buaina chhuak thei ven kawngah te pawh an thuchhuak te chu mipui ngaihchan ber anih avanga fimkhur turin leh ngaihtuahna fim tak hmanga mipuite zirtir zel thin tura chahin an zahawmna vawnhim kawngah dik tak leh felfai taka che thin turin a fuih a ni.

Vawiin chawhma inkhawmah hian C.Lalrochhuanga, Editor, Zothlifim Daily Newspaper chu MJA member atan Pu C.Lalrambuatsaiha, President, MJA General Headquarters chuan lalutin fuihna thu a sawi a, Serchhip khaw tlangval tunhnaia MCS a tling thar Pu Lalnunfela Chawngthu chu Serchhip MJA hmingin an President Pu Kapliana Pachuau-in lawmpuina thuziak a hlan bawk a ni.

Chawhma inkhawm hi Pu Lalremruata Ralte, Vice-President, MJA Serchhip District-in a kaihruai a, Presidential Speech Pu Kapliana Pachuau hnen atang ngaihthlak niin Pu Zonunsanga Kawlni hnen atangin General Secretary Report ngaihthlak ani a, Pu C.Lalhminghlua, Treasurer hnen atangin financial report ngaihthlak a ni bawk. Tunah hian Serchhip District-ah MJA member 16 an awm mek a ni.

Chawhnu lamah kum 2014-2016 chhunga an hruaitu tur an thlanga, he inthlanna hi MJA General Headquarters in kaihruaiin heng a hnuai mite hi an hruaitu thlan tharte chu an ni.

President : Kapliana Pachuau, Editor, Serchhip Times Daily Newspaper

Vice President : Lalremruata Ralte, Editor, Ramlai Arsi Daily Newspaper

Treasurer :   C.Lalhminghlua, Editor, Laisuih Daily Newspaper

Executive Member :

1)      PC Vanlalhruaia, Production Manager, TT Vision, Serchhip

2)      H. Lalbiakzauvi, Editor, Serkhawpui Daily Newspaper

3)      C. Ramengmawia, Editor, Lamkal Daily Newspaper

4)      Zonunsanga Kawlni, Editor, Lenkawl Daily Newspaper

5)      PC Zonunsanga, Editor, Thenzawl Today.