National Commission for Minority Affairs Member Capt. (Rtd) Praveen Dayar chuan zan hnih riak turin vawiin khan Aizawl a lo thleng.

Capt.(Rtd) Praveen Dayar ho hian a thlenna State Guest House-ah vawiin tlai khan State sawrkar mi pawimawhte nen Prime Minister’s New 15 Point Programme leh Multi Sectoral Development Project (MSDP) kaltlanga hmalakna hrang hrang an sawiho nghal a. Aizawl, Mamit leh Lawngtlai District atangin DC leh DC aiawhten an District huam chhunga hnam tlem zawkte tana heng programme pahnih kaltlanga hma an lak dan an tarlan bakah State pum huapa MSDP leh PM New 15 Point Programme hmalaknate department aiawh ten an sawi bawk.

Meeting-ah hian official-te hian hnam tlem zawkte tana sawrkarin hna a thawh mek kawngah awmze nei leh hlawk zawka hna an thawh theihna tur rawtna an neih te an sawi a. Capt.(rtd) Praveen Dayar  chuan MSDP leh PM New 15 Point Programme hnuaiah hnathawh theih awm apiang inthlahrung lova dil thin turin a kaihhnawih Department hrang hrang official-te a fuih a. Proposal an thehluhte chu sawrkar laipuiah a lo bawhzui sak tur thu a sawi bawk.

Vawiin meeting hi Addl.Chief Secretary Pu Arvind Ray chuan kaihruaiin Rural Development, Home, Social Welfare, School Education, Urban Development& Povery Alleviation, Labour Employment & Industrial Training,  District Council Affairs, Mizoram Scholarship Board, NRLM aiawh te bakah Aizawl, Mamit leh Lawngtlai DC te an tel a ni.

Capt. (Rtd.) Praveen Dayar hian naktukah Kolasib a pan anga, DC leh official dangte meeting a neihpui ang.