Tukin zing khan Mizoram Legislative Assembly Building hungchhung  tual laiah    Mizoram District Council Member lo ni tawhte hriatrengna  lungphun  Mizoram  Legislative Assembly  Speaker Pu  Hipheia’n a hawng. ex-MDC te Souvenir  Pu Lalsawta,  Law, Finance Minister in a tlangzarh nghal bawk.

Vawiin hi  Mizo History ah ni pawimawh  tak  leh hriat reng tlak a nih  tur thu  Pu Hiphei chuan sawiin hetianga hriatrengna lungphun a ni thei leh hemi hlawhtlinna atana sulsutu leh buaipuitu zawng zawngte hnenah lawmthu a sawi a. MDC member lo ni tawh  78 te zingah tunah hian an hotu  lo ni thin mi pasarih chiah an la dam a, chung te chu  Pu  C. Chhunbura, Pu C.L Ruala, Pu Mehlai Hlychho, Pu RC Thanga, Pu PC Saprema, Pu  Thanchungnunga leh Pu ZV Lalmawia te an nih thu a sawi a. Hriatrengna lungphun a hawng  nghal a ni. 

Law Minister Pu Lalsawta chuan kan ram hruaitu - mipui aiawh  kum 1952  atanga lo intan chhoh  dan  sawiin tun hma chuan  Lal rorelna  hnuaiah awm in  an ngaihtuahna a awm chawp tha an tih zawng leh tha lo  an tih zawng angin ro an rel a. Chumi  hnu ah Democracy dan anga mipuiiin ro an rel ta chu a tirah chuan a mak viau  mai thei. Mahse mipui  leh  roreltu te inzir  chho  zel in  kan ram rorelna atana  tha tur angin Dan an siam chho zel a, chung zinga tam tak  chu tun thleng in kan la hmang chho va, a thente erawh chu siam rem leh  her rem chhoh zel anih thu a sawi bawk. Tun thlenga la dam  puitu member  pasarih te chu zahna chibai  buk in  dam leh  hrisel  zel tur a duhsakna  hlan in  ex- MDC  te Souvenir chu a chhiar a piangte hriatzauna leh bengvarna lo ni turin a tlangzarh  ta  a ni.

District  Council hunlai atanga  MDC member lo ni tawh  vawiin  thlenga  MP  la ni mek  Pu  C.L. Ruala  chuan kan hotu  hlui te kha  Zoram mipui  hian  an zah in an ngaisang a ni,  a ti a. District Council ah khan rorel in  Mizote awm dan tur  an lo  duang thin  a, term  thumna lai kha rambuai lai anih avangin inthlan a theih lova, kum riat ngawt rorelna chelh tlang anih thu leh term 4 na atang chuan  Union Territory  ah hlan kai a lo nih tak  thu te a sawi a. MDC member lo ni tawhte hriatrengna lungphun na hmun atan pawh District Council rorelna  hmun  thin ngei  tuna an phunna hmun Assembly Building  kawt an duh thu leh  phalsak  an nih na ah  lawmthu a sawi  nghal bawk a ni.

Pu Z.V Lalmawia, ex- EM kaihhruai  vawiin programme ah hian  Pu R.C Thanga, ex-MDC  in  thu hma sawiin  hemi  lungphun hawnna atana  hriattur pawimawh te a sawi a. He hunah hian MDC member lo ni  tawh  chhungte  an kal  tha  hle  a ni.