Nimin March ni 1, 2016 (Zirtawpni) khan Thingdawl BNRGSK Hall ah Pu Hmingdailova, Parliamentary Secretary  hovin Working Committee on Model Village Thingdawl te leh Sub- Working group te chuan an hmalak tawhna hrang hrang an thlir ho a ni.

Bilatu MLA Pu Hmingdailova Khiangte chuan Thingdawl mipuite chu hmasawnna duhtu an ni tih hriain, a bial chhung anih anga hmasawnna chakzawk a kal theihna atan Model Village atan thlang a nih thu a sawi a. A khaw mipuiten balhla, strawberry leh thlai dang chin uar an duh chu a phurpui a, horticulture lamah hma in sawn duhna hi a lawmawm a ni, a ti a. Zoram khaw hrang hrang, a bikin Silchar tlangdung te chu khawthleng rem leh thlai thar chhuak tam tur in nih laia in Bazar ruak reng mai te hi tan lak tulna a ni tih hriain intodelh tura theihtawp chhuah a tul a ni, a ti a. Ram hmelma HIV/AIDS chungchangah fimkhur a tul thute a sawi bawk a ni. 

Meeting ah hian Model Village Working Committee peng hrang hrang te, hmalak tawh chin report te ngaithlak niin zawhna leh chhana hun te hawn a ni a. Sub- Committee pali ti thazual te tan thilpek hlanna neih nghal a ni bawk. Addl. DC Pu R. Lalremsanga pawhin hun hmangin eizawnna kawngah Ni Za inhlawhna chauhva in nghat lovin Job Card submit/surrender hial thei khawpa intodelh turin khaw mipuite a chah a. Model Village an nih angin faina leh thianghlimna chu ngaipawimawh leh zual turin a chah bawk a ni.

Meeting hi Charge Officer  Thingdawl BDO Pu V. Lalruatliana chuan kaihruaiin, he hunah hian committee hrang hrang member bakah khaw mipui thahnem tak an tel a ni.