Election thila meeting tura Hailakandi an kal pahin Kolasib DC Pu H. Lalengmawia, IAS leh Kolasib SP Pu C. Lalzahngao te chuan Bairabi an tlawh nghal a. Bairabi a March ni 31 a inkanga an in lo chanta Pu Zoliankhuma leh Pu Malsawmdawnga te chu tlawhin hnatlang te thingpui in na tur cheng 1000 ve ve an hlan. Bairabi Rel Station area huam chhunga cheng mek chhungkaw 18 te chu Bairabi Police Station ah hmuin hun tiam April ni 30 chhung ngeia helai hmun atanga inthiarchhuak turin an ngen nghal a ni.

Pu H. Lalengmawia chuan helai hmun chhungkaw 18 ten an luah mek hi Bairabi Rel Station area huam chhung niin Railway ram a ni a, railway lamin helai hmun hi Rel Station hmunhma zauhna atan kutthlak an duh tawh avangin heng chhungkua te hi inthiarchhuak turin an ti a. He thil hi thil hrehawm leh tih  nuam lo ni mahse  tul anih avangin bawhzui a ngai a, thinlung intihliam lova hun tiam April ni 30 chhung ngeia helai hmun atanga inthiarchhuak turin heng chhungkua te hi a ngen a. Railway lam hian helai hmuna awm Bazar pawh insawn chhuak turin an ti a mahse DC hian bazar chu railway leh mipui mamawhna anih avangin Bazar thiat lo turin inremsiam a nih tawh thu a sawi a. Chutih rualin NEEPCO Turial Hydel Project huam chhunga, an area chhunga khawsa mek chhungkaw 17 te pawh inthiarchhuak turin nakin lawka hriattirna a chhuah tur thu a sawi bawk.