Nimin khan Assam Assembly Election thawhkhatna April ni 4 a neih tur chungchanga venhimna leh election kaihhnawih thil tul dangte sawi turin Kolasib District thuneitu leh Hailkandi District thuneitu te chuan Manipur Tea Estate, Kaltichherra, Hailakandi ah meeting pawimawh tak an nei a. Kolasib District Administration hi Kolasib DC Pu H. Lalengmawia, IAS chuan hovin Kolasib SP Pu C. Lalzahngoa, Ist IR Battalion Deputy Commandant Pu Lalbiakkila leh SDC Pu Lalhmingliana te hi meeting ah an tel a. Hailakandi District Administration hi Divisional Commissioner, Barak Valley and Hill Areas, Dr. A. U. Chowdhuri chuan hovin Hailakandi DC Pu Moloy Bora, IAS; SP Pi Subasini Sankaran, IPS bakah Katlichherra ah Election Observer atana Election Commission of India (ECI) ina a ruat Pu B. R. Singh leh helai bialah election chhungah venhimna enkawltu BSF 411 Battalion Commandant Pu TNS Reddy te pawh meeting ah hian an tel a ni.

Meeting kaihruaitu Dr A. U. Chowdhuri, chuan Assam Assembly inthlanna thawkhatna, April ni 4 a neih tur ah ramri inthenawm te thawhho a ngaihthu sawiin election chu national thil anih avangin State thenawm te inpuih tawn chu Election Commission duh dan pawh a ni, a ti a. Katlicherra Assembly bial a Polling station 2 chu Assam atanga kal a buaithlak vangin Mizoram atanga luh a ngaih avangin  Kolasib DC leh Mamit DC puihna a mamawh thu sawiin he thilah hian Kolasib DC chu theitawp chhuahpui turin a ngen a. Kolasib DC Pu H. Lalengmawia chuan ramri a awm ve ve an nih angin thawk ho tur an nih thusawiin  kawng engkim ah puih an inhuam tiin ramri a harsatna pawh awm tawhlo se tiin a duh thu a sawi bawk. Hailakandi DC chuan Kolasib DC in inhawng taka Polling Party te kaldan tur a ruahmanpui chu lawmthu hrilhin Election thilah inthlanni hma atanga fimkhur a ngaih vangin Mizo mipui te pawhin harsatna an tawh loh nan hemi hun chhungin (April ni 3 tlai atanga April ni 4 thleng) kawngpui khar tha a tih thu te leh zin veivak mite pawh fimkhur leh zual a ngaih thu te a sawi.

Election Commission of India (ECI) duhdan angin Assembly inthlan dawn apiangin state ramri a district te chu venhimna leh thil danga meeting nei tura hriattir an ni thin a nimin meeting pawh hi ECI thu leh hla bawhzuina a ni.

Meeting zawh hian Kolasib DC leh SP te chuan Alexanderpur thingpui huan chaka awm Mizo khua Kahrawt an tlawh nghal a, a khaw mipuite ten inkawmna hun tawi te an nei bawk a ni.