Sawrkar laipui hnuaia National Commission for Minorities Vice-Chairman Dr. H.T.Sangliana Mizoram rawn tlawh mek chuan vawiin khan Mizoram chhunga hnam tenau Bru, Chakma leh Hmar aiawhte chu Chief Secretary’s Conference Hall, New Secretariat Complex-ah hmuin an harsatna tawh hrang hrangte a sawipui a ni.

 

 

 

 

Minorities Commission Vice-Chairman Dr. H.T.Sangliana chuan thuhma sawiin National Minorities Commission Dan 1992 chuan India ramchhunga ethnic leh religious minorities te an awmna hmun theuhah India Danpuiin chanvo (rights) a pekte leh chung an dikna leh chanvote a taka an hman theihna tur te, civil rights an neih hrang hrangte an hmang thei ngei em tih leh an hman theih lohna turin eng harsatnate nge an tawk tih enfiah tura thawk a ni tih a sawi a. Mizorama hnam tenau zawkten hmasawnna kawngah eng harsatnate nge an tawh tih enthlithlai tura Commission-in a rawn tirh thu a sawi a ni. Mizoram pawn atanga thlir chuan buaina awm lo angin lang thin mahse a chang changa hnam leh sakhua thilah inhriatthiam lohna awm thin chuan boruak muanawmlo a siam lek lek thin a. Sorkar leh mipuite tangrual chuan engtinnge heng harsanate sutkian dan tur ngaihtuah hova tawng hrang hrang, sakhaw hrang hrang awm mahse an inkarah inhriatthiamna leh inunauna, boruak tha, muanawm leh dik awm dan tur zawn chu a pawimawh a ni, a ti. Mizoram hnam tenau Bru leh Chakma leh a dang dang te awmna bialah hmasawnna tur ruahmanna siam chu sorkarin duh thin hle mahse boruak tha leh muanawm neih phawt a ngai a. Mizoram ramri chhunga awm tawh phawt chu ‘Mizo’ an nih tih pawm a, inpawh tak leh tangrual taka hmalak an tum phawt chuan hlawhtlinna a awm ngei a beisei thu a sawi bawk.
He meeting-a Bru aiawha lo telte chuan Mizorama kir leh a awm nghet te tan sorkarin Special Development Project a tiam tawh chu Bru la kir lote nghak lovin tan mai nise an duhthu an sawi a. NCM Vice-Chairman chuan thla leha Tripura a zin hunah Tripura-a la cham bang Bru hotute nen inhmuhkhawm a, Mizoram atanga Bru hotute pawh lo telin hemi chungchang hi sawifel a rawt a ni.
Chakma aiawha lo tel ve Pu Nirupam Chakma, MLA chuan Vice-Chairman hi chhimlam rawn tlawha, a hmunah ngei an dinhmun leh harsatnate rawn enpui turin a sawm a. Mizorama harsatna lian tak pakhat chu Mizorama cheng zawng zawngte hi ‘minority’ an ni sa vek a, chung zingah hnam tenau leh zual an awm leh a, sorkar laipui atanga hmathatna minorities te tan awm hi semrual hleihtheih loh thin chuan Chakmate hmasawnna pawh a ti thuanawp hle a ni, a ti. State Budget-ah heng hnam tenau leh zualte tan 2%-3% chauh dah a ni thin chuan hmasawnna lamah indaihlohna a siam a, tuna sorkar erawh chuan a tihpun tak avangin hmalakna tharte pawh neih an beisei thu a sawi a. Hei bakah hian border fencing-in ramri-a awm Chakma chhungkua tam takte chu in leh lo neih lovin leh an ram laksak ai compensation pawh pek kim an nih loh avangin harsatna namen lo a siamsak thu a tarlang. Sorkar laipui atanga minority-te tana hamthatna tur Minority Cluster Development Programme leh Minority Development Finance Corporation te chu Chakma Autonomous District Council kaltlanga hman tangkai dan tur kawng dapsak turin Vice-Chairman hi a chah bawk a ni. Chakma aiawha lo kalte hian Communal Harmony Programme neih thin chu hnam inkarah inunauna a tipiang hlein an hriat thu leh he programme hi neih chhunzawm zel an duh thu an sawilang bawk.
Sinlung Hills Dvelopment Council aiawha lo kal ten an biala lui 4 khuah tum chuan mi tam tak in leh lo a hlauh tir dawn avangin  leh an awmna tur hmun nghet leh remchang zawk ngaihtuah sak ni se tih leh SHDC budget-ah cheng nuai 250 chauh dah chuan hmasawnna engmah tak tak thlen an rin lo thu sawiin Commission-in an hamthatna tur kawng hrang hrang a rawn ngaituahpui avangin an lawmthu an sawi a ni.
He meeting-a Mizoram Sorkar Home Department aiawha tel Pu David H. Lalthangliana, OSD-cum-Under Secretary chuan state sorkarin minority, border fencing leh thil pawimawh dangte chungchanga hmalak a neih tawh hrang hrang chu Vice-Chairman hnenah a hrilhfiah a ni.
NCM Vice-Chairman hian Home Minister Pu R.Lalzirliana pawh a pisaah tlawhin hnam tenaute tan hmalakna tur hrang hrang a sawipui a ni.