Chief Minister Pu Lal Thanhawla chuan ‘Mipa leh hmeichhiate hi intluk tlang tura Pathian siam kan ni a, inngaichang tawn tur kan ni’ a ti. He thu hi vawiina I&PR Auditoriuma Mizoram State Commission for Women (MSCW) buatsaih, ‘Legal Awareness Seminar on Domestic Violence and Women in Politics’ tih a hmanpuina a a sawi a ni.

Chief Minister chuan kan ram hi hmeichhia tih duhdahna ram a ni a, abikin Hindu hnam hnufual zingah a tam tiin, Mizote zingah ngei pawh ala tam a ni a ti a. Mipuiten zau zawka an hriatna tura hetiang seminar MSCW in a buatsaih hi a pawimawh hle a, Mizoram hmun dangah te pawh uar leh zuala la buatsaih chhoh zel a tha hle a ni a ti. Hmeichhe chunga hleilenna hi tih reh anih theih nan dan te pawh siam a ni a, mahse hei hi a tawk mai lo tiin, Pu Hawla chuan mipuite inzirtir tam a tul a ni a ti. Hmeichhe chunga tharum thawhna hi India ramah kum 2010 atangin vawi sing thum chuang zet a thleng tih sawiin, humhalhna dan a awm tih hrelo te chu a tuartu tam zawk an ni a ti. Mipa tam tak, hna thawk tha peih silo, hmeichhiate hnuaichhiah a, inti pa ve ringawt hriat tur leh hmuh tur ala tam a ni a ti a. Sorkarin hmeichhia ten chanvo tha zawk an neih theihna turin tunhnaiah dan a siam a, Zoram dung leh vangah hmeichhia ten a lawmna te an buatsaih a, lawmnachang an hria hi a lawmawm tak meuh a ni a ti a. Chief Minister chuan chhungkua hi kohhran leh sikul intanna a nih avangin hmeichhia ten an pawimawhna hriain, hmasawn tura tan an lak angai hle a ni a ti.

Hmeichhiate leh politics a sawiah Pu Lal Thanhawla chuan politics hi a bela chhum hmin ngai, a ler atanga luh tum chi a nilo tiin, hel nuai mai chi a nilo a ti a. Politics ah tam zawk lut thei se an duh tih sawiin, mahse mipa rilru sukthlek (mindset) tih danglam anih si loh chuan thil harsa tak a ni a ti a. Thiamna sang tak tak nei  tam tak awm bawk mahse, politicsah chuan mahniin zir angai a ti. Nagaland khawtlang nun sawiin, mipate chungnunna khawtlang anih avangin inthlannaah hmeichhe candidate tur an awm theilo a ni a ti a. Tuna Aizawl Municipal Council, Local Council leh Village Council-ah te hmeichhe seat hausak a ni hi bul kan tan thatna a ni Chief Minister chuan a ti a. Assembly House ah tam zawk awm thei se an duh a, mahse khawtlang nunphungin ala zir lo a ni a ti. MLA seat hauhsak chungchangah State sorkar thuneihna piahlam a ni tiin, Parliament ah pawh hun rei tawh tak atanga sawi thin a ni a, mahse ngaihsak a hlawh lo a ni a ti.

Khualzahawm Pu P.C.Lalthanliana, Minister for Social Welfare chuan seminar hi mipate tan ni awm zawk tak a ni a ti a, hmeichhiaten chanvo an nei a ni tih hi mipaten hria se a fuh zawk awm a ni a ti a. Politicsah chuan hnungzuitu tha tak leh member tha nih hmasak a tul a, hmanhmawh chi a nilo a ti. Mipa hlawhtling tak phena mi pawimawh tak in ni tih hmeichhiate hian in hriat a tha a ti.

Seminar-ah hian Pi Vanlalawmpuii Chawngthu, MLA & Chairperson, MSCW in kalkhawmte lawmna thu a sawi a. Dr. Lalrindiki Fanai chu facilitator a ni a. Pi Tlangthanmawii, Member, MSCW in keynote address sawiin, Nula Sylvie Z.Ralte, Member, MSCW in ‘Hmeichhiate Zahawmna leh Dan ina Humhalhna’ tih paper a chhiarchhuak a, Dr.Zokaitluangi, Member, MSCW in ‘Women in Politics’ tih paper a present bawk a ni. Dr.Lalrindiki kaihruainain sawihona hun neih a ni bawk.