1222/2023-2024

Aizawl, 21^st July 2023 : Vawiin khan Deputy Chief Minister Pu Tawnluia, Department of Personnel & Administrative Reforms changtu ni bawk chuan ATI Auditorium MINECO ah ATI hnuaia tunhnaia din Centre of Excellence Consumer Help Desk kaltlanga mipui(consumer) ten an dikna chanvo an hriatzau thei nan te, heng humhim dan te leh kawng hranga an mahni puithei tu ruahmanna hrang hrang – Web Portal, Mobile Apps, man chawi ngai lova biakpawhna Toll Free leh Booklet tlangzarhna programme chu khuallian niin a hmanpui a. Food, Civil Supplies & Consumer Affairs Pu K. Lalrinliana pawhin he hun hi khualzahawm niin a hmanpui a ni.

Deputy Chief Minister Pu Tawnluia chuan Mizoram ah consumer ten an dikna leh chanvo chungchangah an tim thu sawiin Consumer (Pawisa a thil leitu) ten Awareness an tlakchham avangin a Quality thalo te, a buk diklo te, a siam ni leh thih ni inziaklo te, agent in a tihtur a tih lohah te, pawlh dal chungchangah te han sawisel emaw, kan dikna humhim tur a aw chhuah kan la tim hle a, hemi kawngah kan inzirtir leh kan thangharh a ngai hle a ni, a ti. Mipui tam zawkin an dikna chanvo an hmuh theihna tura ATI-a Consumer Help Centre din hi mipui in an tangkaipui a beisei thusawiin a taka ATI-hmun a va kal kher ngai lo in, Portal leh Mobile atanga Mizoram khawilai atang pawhin Consumer ten an dikna chanvo an hmuh theihna tura thil hriattur kan hriat zung zung theihna tur ruahmanna a ni a, vawiina kan tlangzarh te hi mipuiin lo hmelhriata hmang tangkai turin ka chah duh che u a ni, a ti.

Minister Pu K. Lalrinliana pawhin thusawiin mipuiin kan thil lei reng reng hi a dik nge dik lo tih te, buk a tling nge a tling lo tih te leh a tha nge tha lo tih te kan chik a ngai hle a, consumer ten kan dikna leh chanvo kan hriatna leh humhimna kawnga mipui kan inzirtir leh awareness kan siam zel a pawimawh a. Hetiang kawnga thil diklo kan tawng emaw thil fello a awm chuan District Consumer Forum ah te leh State Consumer Forum ah te complain nachang kan hriat a pawimawh a ni, a ti.

Pu Tawnluia’n Centre of Excellence Consumer Help Desk website(portal) leh Mobile App te a tlangzarh a. Pu K. Lalrinliana’n man chawi ngai lova biakpawhna no Toll Free leh Booklet a tlangzarh ve thung a ni.

Programme hi ATI Director Pi Maria CT Zuali in kaihruiian he hunah hian ATI in consumer ten an dikna leh an chanvo an hriat thei nana Consumer Court, MRP, Gas, Public Transport leh Expiry Date chungchanga video clip tawi an siam te thlir ho a ni bawk.

ATI leh DP&AR (Good Governance Cell) te chuan “Setting up of Consumer Help Centre and Creation of Web Portal and Mobile App” tih chu Sawrkar Laipuia, Department of Administrative Reforms & Public Grievances, Ministry of Personnel, Public Grievances & Pensions, ah theh lutin, project chu a rawn pawmpui a. He project kaltlang hian consumer-te tana hriat tur pawimawh leh an mamawh hun apianga an chhawr tangkai theih tur Web-Portal (consumerchhantu.mizoram.gov.in)  leh mobile atanga awlsam taka an lo chhiar theih nan ‘Chhantu’ Mobile App siam a ni a. Booklet (Consumer Chhantu) leh Toll-Free Helpline No. 18008890851 chu buatsaih niin vawiin khan tlangzarh a ni ta a.Hemi bakah ATI hmunah ‘Consumer Help Centre’ din a ni a, Nodal Officer Pi Lalnunmawii Varte kaihhruaina hnuaiah thawktu pathum an awm mek a ni.

Consumer kan nih anga kan dikna chanvo neihte hriatna kawngah erawh kan la thangharh tawk lo hle. Dan hriatlohna avangin dawrkai leh service provider te bumin kan la awm fo a. Hengte a nih avang hian vawiina tlangzarh takte hi kan chhawr tangkai thiam theih nan ATI chuan mipuite a sawm a ni.