Vawiin khan Health Minister Pu Lal Thanzara chuan Mizoram Departmental officers' Association (MDTOA) General Body Meeting vawi 10-na Tourist Lodge, Chaltlang ah hmanpuiin sawrkarna, sawrkar pisa leh sawrkar hna te chu mipui tan siam a ni a, a neitu pawh mipui an nih thu a sawi.

Pu Lal Thanzara, Minister for Health, etc., chuan sawrkar hnathawkte'n hma an sawn mek thu leh mipui tana dawr an awlsam tan tawh thu sawiin hmasawnna tur erawh a la awm thu Department 29 te thawhhona pawl, MTDOA meeting ah hian a sawi a. Thil tul lem lova file tih khawtlai ching leh zawhna hrang hrang siam chingte chu inenfiah turin a chah. "Sakhaw pakhat leh tawng pakhat hmang deuh vek chenna Mizoram hian kan thenawm state te leh India ram dang aia hmasawn zawk ni turin theihna a nei nasa in ka hria a. Chuvangin, mipui aiawha sawrkar hna chelhtute zawng zawng hian neitu thinlung puin hna thawk se ka duh" a ti a. Minister chuan, "Mipui thlantlin roreltute hian mipui tan thazawka ro an rel sak theihnan leh mipui hamthatna tura tha zawka dan an siam theihnan sawrkar hnathawk te hian thurawn min pek inthlahrung lo turin ka ngen che u a. Mipui tana kan thawhhona hlawk tak a nih ngei pawh ka ring" ti in sawmna a siam a.

MTDOA te chu an Service chungchangah diklo taka nekchep leh harsatna siamsak an nih chuan sawrkarin an harsatnate a enfiahsak tur thu a tarlang a ni. MTDOA General Body Meeting vawi 10-na hi hun 2 ah then a ni a. 1st Session hi Dr.JT. Vanlalngheta, Vice President, MTDOA in kaihruaiin pawl anga an hmalakna leh hmachhawp te Pu Lalchuailova, President, MTDOA in a sawi a. Session 2-na ah rorelna leh MTDOA hruaitu thar thlanna neih a ni.