Vawiin chawhma khan MHIP Sub-Headquarters, Lunglei te chuan Lunglei DC Pi Lalzarmawii, IAS chu a pisaah chawimawina hun an hmang a, MHIP Sub-Headquarters President Pi Zosangi chuan he hun hi a kaihruai a ni.

Pi Lalzarmawii chuan MHIP Sub-Headquarters, Lunglei ten chawimawina leh lawmpuina an buatsaih chu lawmawm a tih thu a sawi a. Hmeichhia te dikna leh chanvo hi mihring dikna leh chanvo a ni, a ti a. Mizo hmeichhia te hi sakhaw dang vuantute nen tehkhin chuan kan vanneih hle a ni, a ti. Hmeichhia te mahni inchhungkhur theuh ah kan pawimawh tiin, kan fate enkawl dan a zirin an puitlin a hna an hmuh thleng engemaw chen kan kuta a in nghah avangin kan inchhungkhura hun kan pek tam a tul a ni, a ti. Chhungkaw harsa tak atang te in Mizo lehkhathiam leh mi hmingthang te an lo chhuak tawh a, Mizo hmeichhia ten kan tum tak tak chuan chin tawk a awm lo a, kan rilru kan dah hniam erawh chuan kan faten an thleng sang dawn lo a ni, a ti bawk. Thawh hona tha tak an neih a beisei thu sawiin, a tangkai theihna apiangah phak ang tawka tanpui a in huam thu a sawi a ni.

Pi Zosangi chuan Sub-Headquarters hmalakna leh project hrang hrang an kalpui mek te report a pe a. MHIP Sub-Headquarters General Secretary Pi Hmingthanmawii Chhangte pawhin inhmelhriat tirna hun hmangin, lawmpuina citation a hlan nghal a ni.

Lunglei DC Pi Lalzarmawii hi kum 1991 khan kum 21 leh thla 9 mi niin Mizoram Civil Service (MCS)-ah a tling a, kum 1995-99 chhung khan Lungleiah Assistant Settlement Officer (ASO)-II hna a lo chelh tawh a. Kumin September ni 29 khan Indian Administrative Service (IAS) ah hlankai a ni.