3862/2023-2024

Dated Aizawl, the 16th February, 2024: Vawiin khan Chief Minister Pu Lalduhoma chuan Mizoram State Public Grievance Redressal & Monitoring System thar, "Mipui Aw" chu Chief Minister Conference Hall ah a tlangzarh a, a kaihhruai sawrkar chu mipuite aw ngaithla turin a inpeih reng tih a sawi.

Thusawiin Chief Minister chuan, mipui sawrkar, langtlang sawrkar kan din theih nan mipuite nen inpawhna tha tak kan neih a ngai a. Mipuite ngaithla turin kan inpeih at reng a, keimahni duhna aia mipuite duhna dah hmasak hi kan inhuam a ni. Chu chu mipui rorelna ram democracy innghahna pawimawh a ni. Chumi hmanrua atana tangkai tak tur Mipui Aw thar kan hawng thei ta hi lawmawm ka ti a. A buaipuitu DP& AR department leh a thawhpui Mizoram State e-governance Society te chungah lawmthu ka sawi. He online portal hi a hmangtu mipuite tan leh a lo chhangtu turte tan awlsamna a thlen ve ve dawn a, mizotawng leh saptawnga hman theih ve ve a ni. He portal hmanga zawhna leh dilna te chu a changtu nodal department te pawhin lo ngaipawimawh turin ka chah che u a, ram mipuite rawngbawlna pawimawh tak a ni tih hre chungin kan kalpui dawn nia, tiin mipuite tana lo inhawng hle turin a viltu tur officer te pawh a chah a. Mizoram mipuite pawhin tangkai takin hmang se a duh thu a tarlang.

DP& AR Minister, Pu K. Sapdanga, Home Minister ni bawk pawhin thusawiin, Mipui Aw hi 1.3.2012 khan a version hmasa lo hman tawh a ni a, kum 2019 laihawl atang khan security thilah a him tak loh avangin kan hmang zui ta lova. Hun engemaw chen kan neih loh hnuin tunah Chief Minister hmalakna zarah a thar tha zawk kan han nei ta a, a lawmawm hle a ni. Mipui Aw hi sawrkar tha kan neih theihna tura Mizoram mipuite sawrkarin a chona a ni a. Tangkai takin, hlawk takin hman kan tum dawn nia, tiin mipuite a chah a ni.

Inkhawm hi Pu R. Lalramnghaka, IAS, Secretary, DP & AR chuan inkhawm kaihruaiin, Mipui Aw an buatsaih dan tlangpui a tarlang a. Chief Minister, DP&AR Minister leh Chief Secretary ten an phurpui avangin he Mipui Aw hi kan puitlin thei a ni a, kan lawm hle. ICT Department ten min duansak niin, an kutchhuak hi a chhuanawm hle a ni, a ti.

Technical Report hi Mizoram State e-governance Society Project Manager Pu Isaac Zothanpuia chuan a pe a. 11th May, 2023 a thawh tan niin tun thla hian zawh fel a ni a, vawiin hian hawn nghal a ni. A siam nan hian a hranin sawrkar pawisa sen a ni lova, Mizoram State e-governance Society mithiam ten an siam a ni. Private company tihtir chu ni se cheng nuaihsawm chuang man tura ngaih a ni. Portal hi saptawng emaw Mizotawng duh zawk zawka kalpui theih a ni a, a hman dan inzirtirna (tutorial) pawh dah nghal a ni.

Mipui Aw hi khua leh tuiten an harsatna te, an vuivaina te, an chanvo te an zawhfiah theihna tur a ni a, a address chu www mipuiaw.mizoram.gov.in a ni.

Pu Paul L. Khuma, Nodal Officer, Mipui Aw chuan lawmthu sawiin inkhawm hi a khar a ni.