2753/2025-2026
Aizawl the 22nd December, 2025 : Deputy Commissioner, Aizawl District chuan Sihhmui Village Council leh NGO ten Sihhmui Bazar bula National Highway No. 44(A) a road accident hrang hrang thleng- thin tihzia awm nan leh heng chetsual palh laka mipuite kan him zawk nan hmala tura an rawn ngen angin, theihtawp a chhuah a. Helai hmuna lirthei khalh chak lutuk leh fimkhur loh a vang hian VC, Sihhmui ten an report danin nunna chan mi paruk (6) leh hliam tuar mi engemawzat an lo awm tawh nia hriat a ni.
Heng chetsualna thleng thinte laka inven nan helai hmuna dah tur hian steel barricade pali (4) ft 6 a sang, hun sawn theih, chu Deputy Commissioner, Aizawl District chuan Sihhmui Village Council leh YMA hruaitute kutah vawiin ni 19.12.2025 hian a hian a. Heng barricade te hi Sihhmui Village Council, YMA leh OC, Sairang Police Station te tang kawpin an enkawl tur a ni ang. Tin, lirthei tian chak lutuk laka in ven nana dah tura tih a nih angin National Highway-a motor tian pangngai tikhaihlak zawnga dah loh tur a ni ang. Heng barricade dah te hi mipui kan him zawkna tur a ni tih hria a, a enkawl tute leh viltu Village Council, YMA leh Police te tan harsatna siam lo a thawhpui theuh tur in Deputy Commissioner, Aizawl District chuan mipui te a ngen tak meuh meuh a ni.
Helai kawng hi National Highway a nih a vangin Ministry of Road, Trasport and Highways (MoRTH) thuchhuak angin Speedbreaker dah a rem lo a, MoRTH-in National Highway atana a phal chin rumble strip dah turin PWD (Highways Division) te nen hma lak mek zel a ni a. He hmalakna hi tihhlawhtlin a nih hma chuan barricade hi hman lailawk tur a ni ang.
