Mizoram Sawrkar chuan mipuite zawm leh ngaihpawimawh atan a hnuaia ami ang hian ngenna pawimawh tak a siam.
Tunlaia khawvel pumin a buaipui COVID-19 hrileng chungchangah Mizoram Sawrkar chu Kohhrante leh tlawmngai pawlte nen a thawk ho va. Theihtawp chhuahin mipuite an lo him zawk nan nasa takin hma a la mek a, hmalak zel pawh tum a ni. A theih ang ang in mipui te him nan hmanraw mamawh ngaihtuah, damlo endik, mipui chetvelna khuahkhirh leh ramri khar thlengin hma a la mek a ni.
Nizan dar 8:00-a Prime Minister Narendra Modi-an ram mipuite hnena ngenna a siam angin, Mizoram Sawrkar pawhin kan zavaia COVID-19 laka kan lo him tlan zel theihna turin March ni 22, 2020 (Pathianni) hian mipuite zing dar 7:00 AM atanga zan dar 9:00 PM thlengin tumah pawn chhuak lova mahni chenna in theuh a awm turin a ngen a. Chu bakah, tlai dar 5:00 PM ah he hrileng COVID-19 dona lama hma la tute zawng zawng - Health Department a thawktute, Police leh venhimna lam thawktute leh midang thahnem ngai taka thawktute zawng zawng duhsakna leh zahna lantir nan ri thei chi hrang hrang - khuang, hamrik leh adangte ti ri turin a ngen bawk a. Pawn chhuak lo va mahni in theuhva awm tura ngenna hi Kohhran hrang hrang ten inkhawm leh Kohhran programme dang siam lo va chhungkaw tin ten chhungkaw maicham buatsaih tura hmalak te nen pawh a in kalh loh avangin March ni 22 (Pathianni) hi chhungkaw maicham buatsaih nana hmang tangkai theuh turin mipui zawng zawng te a ngen.
He ngenna hian damdawiin lam thawktute, dan leh hrai keng kawh tute leh mipui mamawh rawngbawlsak tute leh adangte a huam lo vang.
