No.1746/2021-2022
Mamit 9th August, 2021 : Dr. Lalrozama, IAS District Bawrhsap-in thuchhuah a siam angin, Mizoram Sawrkar Disaster Management & Rehabilitation Department lehkha No. B. 13021/101/2020 - DMR dt. 7.8.2021-in rem a tih angin, thu leh awm hma chu a hnuaia tarlan ang hian Kanhmun (Mizoram) leh Damcherra (Tripura) chu inkalpawh phalna (free movement permit) pek a ni a, a hun leh ni chu a hnuaia tarlan ang hi a ni ang.

A ni :Thawhtan leh Zirtawpni
A hun: Zing dar 10 atanga chhun dar 2

Hemi hun chhung hian Damcherra atanga bazar tura Kanhmun lo lut duhte chu mpass ngai lovin, thermal screening hmanga endik an ni ang a, symtoms an neih chuan Rapid Antigen Test tih chauh tur a ni ang. Chhun dar 2 a ral hma ngeiin Damcherra-ah an kir leh tur a ni a, Kanhmun khaw chhung bak kal phal a ni lo ang. Kanhmun piahlam kal turte chu mpass-ah an in register hnuah medical screening kalphung pangai an paltlang a ngai ang.

Kanhmun atanga Damcherra-a bazar turte chu Kanhmun VLTF-ah phalna an la hmasa tur a ni a, Damcherra-a bazar tur hian mi pakhat tan a rei berah darkar 2 hun pek an ni ang. Chutihrual chuan chhun dar 2 thleng hun pek an nih angin, darkar 2 ala ral lo a nih pawhin chhun dar 2 rik hma ngeiin Kanhmun-ah an kir leh tur a ni.

He phalna hian ke a kalte chauh a huam ang. Hun bituk bawhchhia an awm chuan sorkar dan dinglai, The Mizoram (Containment and Prevention of the Spread of Covid - 19) Act, 2020 Chapter - II, clause 5 Sub-clause 9)-in a tarlan angin, cheng 1,000/- chawitir an ni ang. Pawisa chawi duh lo an awm a nih chuan he dan vek chapter II, clause 5 sub- clause 16) in a tarlan angin thla 3 atanga kum 1 thleng lung in tan tir theih an ni ang. Tin Kanhmun an rawn kir hnuah pawh hun bi tuk bawhchhia te chu Health & Family Welfare Department, Govt. of Mizoram dan dinglai angin screening an paltlang hnuah quarantine tur an ni ang. Free movement hun chhunga veivak te reng reng chuan Covid - 19 Appropriate Behavior in kaihruaina (social distancing, mask vuah etc.) an zawm tlat tur a ni.