Kolasib District hnuaia Department hrang hrangte hmalakna thlir hona a tana committee din, District Level Coordination Committee member te chu vawiin khan DC Conference Hall ah Bawrhsap Pu Zoengsanga kaihhruaina hnuaiah an thukhawm.

He hunah hian Bawrhsap chuan Office kal leh haw hun chungchangah Sawrkar thupek zawm chu Sawrkar hnathawk te mawhphurna ani tiin hun vawng dik turin a chah a, Mipuite chu kan hnathawh chhan an ni a tupawh Office dawr tura rawn kal reng reng chu hawihhawm taka lo dawngsawng in  an mamawh leh harsatna neih te chu sutkian dan tur lo dap pui a, lo tanpui chu Sawrkar hnathawk te tih makmawh ani tiin Mipuite rawngbawl sak turin Sawrkar in min chhawr a, mipuite rawngbawl sak chu kan hlawh lakna chhan ani a mahni hna ah rinawmna, in pekna, thahnem ngaihna leh kalphung zawm that (discipline) chu vawn tlat tur ani a ti bawk.

Bawrhsap chuan kartawpa Aizawla haw chungchang sawiin kartawp pawh nise hna emaw thil tul avanga inkoh thut a awm thei a, phalna la hmasa lo leh chhuanlam fahrah te te hmanga Station chhuahsan fo lo tura chahin, mahni hnathawhna hmuna awm that chu kan mawhphurna ani a ti a, Kolasib chu Office inrelbawlna kawnga District titha ber  nih tum tur in leh midang te tana District entawn tlak a nih theih nan tan lak pui leh thawhho pui ah kalkhawm Department hrang hrang Officer te a sawm a ni.

Pu Zoengsanga chuan Hnam huaisen ni tur chuan Hnam intodelh nih a ngai ani tiin mamawh tharchhuah na kawngah tan lak a ngaih thu a tarlang a, Kolasib District tana hmalakna tura ruahmanna a neih te a tarlang bawk a ni.

Thutkhawmah hian Sawrkar kum liam ta a Department hrang hrangte hmalakna thlir ho a ni a, chung zinga thenkhat ah chuan Forest Department lamin kawng hrang hrang atanga an sum (revenue) lakluh chu nuai 133 vel nia tarlan ani a, thingzaina (chain saw) chu phalna tel loa lei leh zawrh phal a niloh thu tarlan bawk ani a, Land Revenue & Settlement chuan kum liamta khan Registration fee leh Stamp duty atangin cheng 2,115,415 an lalut a, Bilkhawthlir RD Block chuan scheme pathum MGNREGA, PMAY(G) leh NRLM/MzSRLM an kalpuui a MGNREGA hian khaw 36 huam in Job Card 12,911 pek chhuah ani a MzSRLM chuan VC 22 a huam bawk ani. Agriculture Department chuan NEDP hnuiah Nuai 1037 an dawnga, item 14 hnathawh na atan hman turin CSS hnuaiah cheng 91.318 an dawng bawk ani, heng te hi kut hnathawkte mamawh phuhruk nan leh tanpui nan bakah hnathawh nana hman an ni. CMO tarlan danin Kolasib District a infant Mortality rate chu za zela ah 24 ani a hei hi State aiin a hniam a, tun dinhmunah naupang kaw thalo hri danna Rota Virus Vaccine pe turin hmalakna peihfel tep a nih thu a tarlang bawk. MI 1063 test zingah Tb hrik pai mi 231 an awm a, heng te hi enkawlna pek an ni a tun dinhmuna damna chang (cure rate) chu 84 % vel ani .(Damdawi ei thalo an awm thin avangin cure rate hi 100% kai a har), hemi bakah hian kum 3 chhungin Kolasib District ah Malaria natna avanga thi an awmlo tih tarlan ani a, HIV/AIDS ah mi 4107 te thisen exam atangin mi 169 te chuan HIV hrik an pai tih hmuhchhuah ani a, CMO chuan HIV/AIDS do let tur hian Medical chauh ni lovin Sawrkar Department zawng zawng leh Khawtlang tan hona a pawimawh thu a tarlang bawk.

He hunah hian Department tam zawkin an hmalakna report te an pe a, thutkhawm leh hunah Department dang ten an la pe ve leh dawn a, District level thutkhawm hi thla tina nei theihloh pawhin Quarterly a neih thin tura ruahman a ni.

Hemi bakah hian Kolasib District thalaiten zirna kawnga hma an sawn dan tur ngaituaha sawihona hun hmang turin June ni 17 chu ruahman ani a, he hunah hian Sikul hrang hrang head/Principal, College Principal, DIET, YMA hruaitute, VC te leh MJA te chu sawm nise tia rel bawk a ni.

Thutkhawm ah hian Kolasib District a Department hrang hranga Head of Office te an kalkhawm tha hle ani.