Nimin (10.6.2019) Chief Minister Pu Zoramthanga hova Council of Ministers, CM Cabinet Meeting room-a thukhawm chuan Mizoram Public Service Commission kaltlanga hna lak tam lutuk chhawkzangkhaia, an hna lak leh thawh turte a hun tak zela MPSC in an kalpui thin theih nan Group “B” Non-Gazetted recruitment chu MPSC mawhphurhna atanga lachhuak a, Mizoram Subordinate Services Selection Board hmanga lak thin ni tawh se tiin a rel a, hemi atan hian Mizoram Subordinate Services Selection Board din tura thutlukna siam nghal a ni.

Council of Ministers meeting hian department hrang hrang atanga thu pawimawh ngaihtuah tur lutte chu sawihovin, chung zingah chuan hengte hi a tel a ni:

Sinlung Hills Council inthlan neih thuai theih nan The Mizoram (Election to Sinlung Hills Council) Rules, 2019 chu pawm a ni.

Mizoram House, Guwahati a thlengtu mipui indaihlohna chhawk zangkhai tura sak belh emaw ram lei belh chungchang chu ngaihtuah a nih hnu ah meeting hian a thuphungin a pawm.

Government of Mizoram (Allocation of Business) Rules, 2019 chu pawmin, hemi hi department hrang hrang hna chanpual siam that ngaite siamthatna a ni.

Health & Family Welfare Department atanga The Mizoram Clinical Establishments (Registration & Regulation) (Amendment) Rules, 2019 lut chu pawm a ni.

Social Welfare Department atanga The Mizoram Drug Treatment cum Rehabilitation Centre (TRCs) Accreditation Rules 2019 lut pawh pawm a ni a. Hei hi tun dinhmuna Mizorama ruihhlo ngaite enkawlna hmun mimal din 40 bawr vel awm te chu rualkhai leh mumal taka inkaihhruaina fel tak an neih theih nana duan a ni.

LESD&ED atanga Draft Mizoram Youth Commission Rules, 2019 ngaihtuah tur lut pawh pawm a ni a, Mizoram Youth Commission hnathawh chungchanga kaihhruaina fel tak neihna tura siam a ni.

The Mizoram (Land Revenue) (Amendment) Bill, 2019 chu The Mizoram (Land Revenue) Act 2013 siamthatna atan pawm a ni a. Hei hian ram lei leh hralh chungchangah mipui tana samkhai zawkna thlen a sawrkar pawhin awlsam leh felfai zawka hna a thawh theihna tura siam a ni.