Tukin zing dar 7:00Am khan Mizoram hmundang te rualin DC Office kawtah Thing phunin, boruak thianghlim i siam ang u  tih thupuia hmangin Green Mizoram Day 2019 hawnna programme hman a ni. GM Day hawnna Programme hi Pi B.Malsawmtluangi SDO(S) in a kaihruaiin, Pu F.Lawmkima,EM (Forest),MADC chu khuallian a ni.

Khuallian Pu Lawmtea chuan thusawiin,  Kan ramngaw te kan ti chereu nasat tawh avangin a kum telin Mizoram pawh a lum tulh tulh tawh a ni. Amaherawh chu kum 5/6 kal ta vel atang khan Mizoram District khawpui te zingah Siaha khawpui chu degree celcius hniam ber pawlah kan awm tawh a ni. Hei hi Green Mizoram Day puala district chhunga thingphun uar taka kan lo kalpui tawh thin rahchhuah ve pakhat  a ni, a ti.

Pu Lawmte chuan Ui hi mihring thiantha tak a ni, tih hre vek mah i la, mahni vulh ui leh ui dang kan thlir dan leh hmangaih dan a inan loh ang hian, mahni ngeia kan phun Thing te chu kan veiin kan duat bik lo thei lo thin. chuvangin, vawiin lo kal khawm te hian mahni ngeiin Thingtiak pakhat tal theuh phun vek i tum ang u, tiin kalkhawm te a sawm bawk.

 Tukin GM Day hawnna inkhawmah hian  Pu NT.Beithlaoalo,FRO MADC chuan Kan thing leh mau leh ramngaw te humhalh tura  thutiam Green Mizoram Day Pledge chu mipui kalkhawm te a tiam tir bawk a ni.

Pu Beichatlaisa Azyu, FRO, MADC in report peiin, nikum GM day 2018 ah khan  MADC Forest dept in 2500 a sem chhuak a.Kuminah hian Thingtiak 1500 an sem chhuak  leh dawn a. Dept thingphunna tur ramruak nei te leh mimal thingphunna tur ramruak nei te  hnenah an pek chhuah dawn bakah hian MADC forest Dept chuan hmun thlanbikah mass planting beihpui an thlak leh  dawn bawk a ni. Nikum chhung khan Siaha District-ah Kangmei vawi 89  chhuakin, Ramngaw 173Ha a kangchhia a ni.

 Tukin programme-ah hian kumin chhunga  kangmei laka an khaw huam chhunga ramngaw veng tha ber khaw 3 te hnenah chawimawina certificate leh tangkafai hlan an ni a, chungte chu:-

Pakhatna---Saikao khua  niin certificate+ Rs.50,000/- an dawng a.

 Theiri khua chu 2-na   niin, cerrificate+ Rs.30,000/- an dawng ve  a.Laki khua chu 3-na niin, Certificate +Rs.20,000/- an dawng ve bawk a ni.

Pu Jimmy N.Ramdina, ACF,MADC chuan lawmthu sawiin GM Day 2019 hawnna programme chu a khar ta a ni. GM Day hawnna programme hmanzawh hian Forest Dept, MADC chuan Thingtiak a sem chhuak nghal a. Kumin thingtiak an sem chhuah tam ber te chu Ngiau,Tlaizawng, Thlado leh Silver Oaks te an ni.

Attachment

  • Loading attachment...