Vawiin khan Mizoram Remote Sensing Application Centre (MIRSAC) in Remote sensing leh Geographic Information System (GIS) thiamna hmanga Mizorama Sericulture hlawhtlin theihna hmun tha an zawnchhuahna report bu an buatsaih chu Dr. Vanlalzara, Principal Scientific Officer, Science & Technology in Sericulture Department hnenah an lo hman tangkai turin a hlan.
Dr. Vanlalzara chuan Mizoramah Sericulture hi eizawnna tlak a ni a, tharum hman vak ngai lova sum lakluhna tha tak a nih avang leh nasa zawka kalpui theih a nih chuan a hlawk hie dawn a. MIRSAC-in Remote Sensing leh GIS thiamna hmanga Sericulture-a hma lak theihna hmun tha an zawng chhuak hi Sericulture lama tuimi .leh Department tan pawh thil tha tak a ni dawn a ni a ti. MIRSAC hi India hmar chhak state hrang hranga Remote Sensing Centre zingah hnathawk tha ber leh Department of Space hotute leh Central lama mithiamte pawhin an rin em em a ni, a ti.
He inkhawmah hian Pu Lalnunsiama Colney, Senior Scientist, MIRSAC chuan Power point hmangin technical report a pe a. Mizoramah hian kan lo neih avang a ram bua leh ramchhia (Wasteland) eng emaw zat a awm a, heng ramah hian Silk pangang chaw - Theihmu, Sasua, Mutih leh a dangte hi tha taka chin theih a ni a. Mizorama District 6 an zirchianna atanga a lan danin Theihmu (Mulberry) chin theihna hmun hi 1439 sq.km vel a awm a, Theihmu nilo (Non-Mulberry) chin theihna hi 8322 sq.km lai a awm bawk a ni, a ti a.
He inkhawm kaihruaitu Dr. R.K. Lallianthanga, Project Director, MIRSAC chuan he project hi Central Silk Board (CSB) bul tuma North East Space Application Centre (NESAC) leh MIRSAC tangkawpin an tih anih thu a sawi a, MIRSAC chuan Mizorama Department hrang hrangte Remote Sensing leh GIS thiamna hmanga tanpui hi a thil turn anih thu leh theih patawpa hma lak zel an turn thu a sawi bawk.
He inkhawma thusawitu dang, Sericulture Director Pu D. Engzananga pawhin Remote Sensing leh GIS thiamna hmanga Mizorama Sericulture that theihna hmun hriat theih ta hi a lawmawm hle a, MIRSAC Scientist te chungah lawmthu a sawi a. Tangkai taka Sericulture Department leh Sericulture a tui miten an tangkaipui ngei a rin thu a sawi a ni.
