Vawiin chawhnu 12:30 ah Mizoram Legislative Assembly Annexe Conference Hall-ah Taxation Department E-services leh website hawnna neih a ni. He hawnna inkhawm hi Pu Lalthansanga, Secretary, Taxation Department in a kaihhruai a ni.

He inkhawm ah hian Pu Lal Thanhawla, Chief Minister in e-services hawnna a nei. Thu sawiin Chief Minister chuan Mizoram sorkar hnuaia Taxation Department in chhiah pek na awlsam zawk computer thiamna hmanga a neih ta chu hmasawnna pawimawh tak leh sorkar tan pawh thil chhinchhiah tlak a ni a ti. Mizote hi pi leh pu atanga chhiah pe hnam kan ni a ; kan thurin Bible pawh in chhiah pe tura zirtir kan ni a ti. Chuvangin chhiah tha tak a pek hi kan thurin leh Kristian kan nihna nen pawh a inhmeh a ni a ti. Mizo mipuiten dik tak leh rinawm taka chhiah kan pek theuh hi khua leh tui tha kan nihna a nih avangin, khua leh tui tha kan nih theihna turin kan inzirtir uar a ngai a ni a ti. E- Services hian E-registration, E- return, E- way bill leh E-payment te a keng tel a ni.

He inkhawm ah tho hian Pu J.H. Rothuama, Taxation Minister pawhin Taxation Department Website hawnna a nei bawk. He website atang hian thil tam tak thawn leh hriat theih anih a beisei thu a sawi. Taxation department website hi www.zotax.nic.in a ni.

He e- service leh website hawnna inkhawm hi Pu R. Romawia Speaker in a hmanpui a ni. He hawnna inkhawm ah hian sawm bik te an kal tha hle.