Vawiin chawhnu khan Administrative Training Institute (ATI) Conference Hall-ah Mizoram Information Service (MIS) probationer, Foundation Training zote thlahna hun, Valediction Programme hman a ni a, Information & Public Relations Department Secretary Pu B. Lalthanliana chu khuallian niin Training chhuak tharte hnenah Certificate a hlan a ni.
Khuallian chuan MIS Probation (2017)-te puala Combined Foundation Training buatsaih a nih avangin lawmthu a sawi a. Sawrkar hnuaiah a ni emaw, mimal hnuaiah a ni emaw, Corporation/ Company hnuaiah a ni emaw, tu hnenah pawh hnathawh dawn chuan a ruaitu (employer) chuan a hnathawkte hnathawh dan tur atan inkaihhruaina fel tak an nei vek thin a, Mizoram sawrkar duh dan leh inkaihhruaina chi hrang hrang hrechiang tura MIS leh MCS officer tharte tan training buatsaih a ni chu anmahni leh mipui tan pawh thil hlawkthlak tak a nih tur thu a sawi a. I&PR Secretary chuan Rules & Regulations hrang hrang hrechiang sawrkar hnathawk chu a kal ngil thin a, midang tan an rintlakin Pi leh Pute rin an hlawh nge nge thin thu sawiin, chutih laiin Dan leh Hrai zir peihlo, ngaihsak peihlo chuan mualpho hun an nei thin thung, a ti a. Mizoram Sorkar hnuaiah leh hmun dangah dinhmun pawimawh tak, hna sang tak chelh tur an la nih thu trainee-te chu hrilhin, nun uluk leh invawng tak chung zela hnathawh bul an tan chuan mi ropui tak an la nih ngei theih thu a sawi bawk a. Foundation Course Training-a an thil zir leh hriatte chu kawng hrang hrangah an chhawr tangkai ngei a beisei thu leh, chutianga an chhawr tangkai theih nan training zo mek leh la bei mekte duhsakna a hlan thu a sawi a ni.
He Valedictory Programme hi ATI Joint Director leh Course Coordinator ni bawk, Pi Angela Zothanpuii, MCS chuan kaihruaiin, MIS Trainee-te tangin Valedictory Speech ngaihthlak a ni a. Hun hi Asst. Course Coordinator Pi Daphne Zosangpuii chuan lawmthu sawiin a khar a ni.
Tun tum Foundation Training hi March ni 1, 2017 atang khan tan niin, MCS Probationer 8 leh MIS Probationer 5 an tel a. MCS Probationer-te hian thla 3 dang training an la neih chhunzawm dawn a ni.
