Vawiin chawhnu dar 3:00 khan Serchhip Bawrhsap Pisaah Pu V.L.  Hmangaiha, Head Teacher(Rtd), Government Leng Primary School chu zirtirtu hna a thawh laia a hnathawh that avangin Serchhip Bawrhsap Dr. Lalrozama, IAS chuan chawimawina a hlan.

Pu V.L. Hmangaiha, Head Teacher (Rtd) hian kum 1984 khan a School naupang pakhat rualbanlo (țawng theilo) chu theih tawpa țawng zirtirin a lo kaihruai țhin a, khawtlang pawhin mi pangaia a chhuah an rin tawh mang loh hnuin hmangaihna nen tih tak zeta tawngthei tura a kaihhruai hnuah mi pangai anga thain he a zirlai naupang hi a chhuah ta a, he a naupang enkawl hian nupui fanaute pawh neiin hlim takin tunah hun an hmang mek a ni. Hetianga hlawhtling taka zirlai naupang enkawl mamawh bik lo enkawl chhuak tawhtu a nih avang hian Leng khawtlang hruaituten Serchhip Bawrhsap Dr. Lalrozama, IAS hnenah hian an thlen a. Dr. Lalrozama hian hun rei deuh tak kal tawh a mi mah ni se chutiang mi chhuanawm leh hnathawk tha chu engkawng emaw tala chawimawi tha a tih avangin District MJA hotute, YMA hotute leh mi dangte berawn chungin he chawimawina hi vawiin hian a hlan ta a ni.

Vawiina Pu VL Hmangaiha chawimawina hunah hian Sub Headquarters YMA hruaitute, MJA member te leh District Officer pawimawhte an tel a, Pu R. Vanrengpuia, SDO Sadaar chuan Pu VL Hmangaiha hnathawh thin dante sawina hun a hmang a ni.

Serchhip District Bawrhsap Dr. Lalrozama, IAS hi National Healh Mission-a Director hna chelh tura tih anih angin vawiin Serchhip a chhuahsan hnai tawh a, hei vang hian vawiin tlai dar 3:00 khan a Office ah Sub Headquarters YMA Serchhip te chuan  amah thlahna buatsaih nghalin ngaihhruina thuziak an hlan a ni.