Nizan khan NYK Lawngtlai leh YLA Chawnhu Branch tang kawpin Skill Upgradation Training Programme hnuaia puan thui zirna (short course) an buatsaih chu YLA Hall, Chawnhu-ah a kharna hun hman a ni.

He huna Khuallian, Lawngtlai DRDA Project Director Pu R. Lalremsanga chuan khawtlang hmasawn nan zirna leh hriselna chu thil pawimawh ber a ni, a ti a. Sawrkarin mipui hmasawn nana programme hrang hrang a duante a hlawhtlin nan khua leh tuite’n mawhphurhna an neih thu sawiin, a nihna ang taka hmang turin taima leh dik taka hna thawh a tul a ni, a ti a. Chumi chu ngai pawimawh turin kal khawmte a sawm nghal.

Khual Zahawm, Lawngtlai Divisional Horticulture Officer Pu L.Lalhmingmawia Pachuau chuan Chawnhu khawtlanga puan thui zirna buatsaih a ni chu thil lawmawm tak a ni, a ti a. Sawrkarin thiamna tihpun (skill development) a ngai pawimawh em em a, chumi tihlawhtling tur chuan sawrkar department hrang hrangte pawh lungrual taka thawh ho a tul thin a; Horticulture Department chuan tu pawh thawhpui a inpeih reng a ni, a ti. Theih tawp chhuaha hna thawh chuan hlawhtlinna a awm ngei ngei thu sawiin, hna tha nei tur chuan eng kimah a neitu thinlung pua hna thawh zel a pawimawh, a ti bawk. Khual Zahawm hian Chawnhu Bazar Shed enkawl zui nan VCP hnenah Rs 30,000/- a hlan nghal a ni.

He hun hi Chawnhu Branch YLA President Pu B. Lalramtluanga’n a kaihruai a. Lawngtlai NYK-a District Youth Coordinator Pi Mercy Sellate chuan NYK hma lakna hrang hrang sawiin, skill upgradation leh sports promotion lama an hma lakna te a tarlang a. Thalaite hmasawn nan NYK-in theih tawp a chhuah mek thu a sawi a. SUTP Instructress Pi Kros Chawisangliani te, Chawnhu VCP Pu T.Zamliana te, Lawngtlai DIC Functional Manager Pu C. Dokulha te pawhin thu an sawi a. Branch YLA Secretary Pu VR Nghaka Hlawncheu chuan lawm thu sawiin, hun a khar a ni.

He SUTP hnuaia puan thui zirte hi a tirah chuan mi 20 vel an ni a, mi 13-in tha takin an zir chhuak a ni. Puan thui zir chhuakte hi Certificate hlan vek an ni a. Lawngtlai DHO Pu L.Lalhmingmawia Pachuau hma laknain IWMP PS & ME hnuaiah a ti tha zual mi 3 te hnenah electric puan thui khawl tha tak leh a bak mi 10 te hnenah kut khawl tha tak hlan an ni bawk.

He training-a Instructress Pi Kros Chawisangliani  hian DHO PIA hnuai IWMP Lawngtlai-I Project-a Production System & Micro Enterprise (PS&ME) scheme-a tanpuina a dawn atanga bul tan a ni a. Hma sawn chho zelin, a hnen atangin mi eng emaw zatin puan thui an lo zir chhuak tawh a ni.