All India Radio, Aizawl chuan tun Pathianni lo thleng tur April ni 2 atangin programme puanchhuah hun ti seiin programme thar engemawzat a ruahman belh dawn a, programme chhuah hun thenkhat thlak a ni dawn bawk a. Hetiang in:

1. Zanlam programme dar 10 a tawp thin chu darkar chanve a ti seiin dar 10:30 thleng programme a puangchhuak tawh ang.

2. Sawrkar laipui hmalakna lian "Fai leh thianghlim inzirtirna" programme -Ninga zan dar 9:30 ah puanchhuah thin a ni ang.

3. Thil thleng langsar chungchanga mipuite ngaihdan tarlanna "Mipui Aw" chu Zirtawpni zan dar 7:30 - 8:00 inkarah ngaihthlak theih a ni tawh ang.

4. Sawrkar laipui policy, hmalakna hrang hrangte leh a bawhzui dan chungchang Nilai zan dar 9:30 ah puanchhuah thin a ni ang.

5. Hriselna huang programme Ninga zan dar 7:05 a chhuak thin chu Zirtawpni tuk dar 7:15 ah thlak a ni a, Gandhi zirtirna programme leh Hnam inpumkhatna pual programme Zirtawp tuk a chhuak thin chu Ninga zan dar 7:05 ah puanchhuah a ni tawh bawk ang.

All India Radio, Aizawl hian Primary Channel ah nitin darkar 14 ½  chhung programme tha tak tak a puangchhuak tawh dawn a. FM Zoawi channel ah nitin darkar 8 ½ Rimawi leh programme tha tak tak a puangchhuak tawh bawk ang. Mipuite zirtir, tihhlim leh tih bengvar nan a nitin darkar 23 chhung programme puanchhuah tur te lo ngaithla zel turin mipuite an ngen a ni.