Mizoram Information Service Association (MISA) te chuan vawiin khan I&PR Conference Hall-ah Annual General Conference an hmang a, Department of Information and Public Relations hmalakna leh sorkar leh mipui tana an hnathawh kawng hrang hrangah hak zauh belhchhahna tur thil pawimawh engemawzat relin kum 2013-2014 chhung atana an pawl hruaitu thar tur te an thlang nghal a ni.

Vawiina MISA Conference hmanpuitu Parliamentary Secretary to CM Pu Lal Thanzara chuan he Department-a Information Service ten chak lehzuala ram tana hna an thawhna kawngah an mamawh hrang hrang phuhruk nan sum leh pai lamah harsatna a awm lovang, a ti. Pu Lal Thanzara chuan he Department-a Officer -te hi a lu nungin tlem hle mahse sorkar leh mipui bengvarna kawnga hna an thawhah te, an Department chhung inrelbawlna kawng hrim hrimah te fak leh chawimawi an phu a, eiruk leh hlemhletna kawngah pawh an fihlim hle nia a hriat thu sawiin he an nihna leh chanvo pawimawh tak hi humhalh a, englai pawha tanla thar reng turin a fuih a ni. Sorkar thu leh hla pawimawh thehdarh leh semzai kawnga an harsatnate pawh sorkarin a hriat sak reng a ni, a ti bawk. Pu Lal Thanzara chuan mipui thlan rorelna-a thlan lal te hi mipuite rawngbawltu an ni a, anmahni thlangtu mipui leh pawl hrang hrang ten an thil tih a telpui tura an sawma, an tel pui hi an tihtur (duty) a ni zawk a, amaherawhchu kalna awm leh awm lo chu thliar thiam a ngai a ni, a ti.

Sorkar flagship programme, NLUP pawh sawi kaiin Parliamentary Secretary chuan rethei leh kuthnathawktu te dawmchhuahna kawnga he Department tawiawmna tha tak sorkarin a dawng chu lawmawm a ti a, District hrang hranga Information Officer-te pawh tanlak zui pui zel turin a sawm nghal a ni.

Conference hmanpuitu dang, I&PR Secretary Pi M Zohmingthangi pawhin Information Service Officer te chu an dikna leh zahawmna, inpekna leh hawihhawmna thlenga humhalh zel turin a chah bawk.

Vawiin Conference-ah hian tunhnaia Mizoram Public Service Commission-in Civil Services (Combined Competitive) Examination a buatsaih paltlanga MIS Officer thar pali te lawmluhna hun hman a ni a. Service chungchang leh Department hmalak chungchangah thil pawimawh engemaw zat an rel a ni.

Chawhma lama Conference hawnna hun chu MISA Vice President Pu R Vanhnuaithanga’n a kaihruai a, chawhnu lama rorel inkhawm erawh an President Pu David L Thangliana’n a kaihruai thung a ni.

MJA General Headquarters kaihhruaina hnuaia hruaitu thar an thlanchhuah te chu President David L. Thangliana, Vice President F. Lalfakzuala, General Secretary P.B. Lianthangpuii, Secretary Robert Thangmawia, Treasurer Lalnunmawii leh Finance Secretary Pratap Chhetri te an ni.