1005/2025-2026

June ni 30, 2025: Mission Director, NHM, Mizoram chuan Mamit Hemodialysis Machine chungchang hriattirna a hnuai ami ang hian a chhuah:

National Health Mission (NHM) hnuaiah hian Pradhan Mantri National Dialysis Program (PMNDP) a awm a. He program-in a thil tumte zinga pakhat chu - district tina dialysis centre din a, dialysis avanga mipuite sum sen tihtlem a ni. Mizoram pawhin hemi bawhzui hian district tin (district thar pathum tel rih lovin)-ah dialysis centre din tumin hma a la mek a. Aizawl leh Lungleiah chauh dialysis centre awm thin kha he hmalakna avang hian Champhai leh Kolasib-ah te dialysis centre din belh a ni tawh a. Mamit, Siaha leh Lawngtlaiah te pawh centre din belh turin hmalak mek zel a ni.

Mamit, Siaha leh Lawngtlai te tan tun hnaiah CSR atangin dialysis khawl Mizoramin kan dawng a. Heng khawlte hi kumin April thla khan an awmna hmun turah dah a ni tawh a ni. Dialysis centre din tur hian dialysis khawl mai bakah, RO plant (tui tihthianghlimna) bun hmasak a ngai a; a hmunhma zau tha ve tak, RO plant bunna bakah, dialysis tihna tur ward, khawl neih zat mil zela zau neih a ngai bawk. CSR atanga dialysis khawl dawnte min petute’n duh dan felfai tak an nei a, khawl dawnte hi an deliver ruala install mai theih tura a hmunhma lo peih vek tur kan ni.

Mamit tana khawl pali kan dawnte pawh hi building hluiah hmun a awm loh vangin building thar luah huna install tura ruahman a ni a. Kumin March thla khan kan donor-te hian rawn deliver a, install nghal an duh tawh a. Amaherawhchu, Mamit District Hospital building thar hi luah hman a nih tak loh avangin 15th June 2025 thleng nghah min phalsak a ni.

Dialysis khawl min petu kan donor-te hian Installation Report leh Utilisation Certificate an thehluh a ngaih tawh avangin Mamita khawl install lohva awm reng chu district dang, install theih nghalna hmunah dah sawn (relocate) rih mai turin an rawn tih angin, a hmunhma peih sa vek tawh Champhai leh Serchhipah te dah mai turin ruahmanna siam a ni.

Kan donor atanga tun hnaia lehkha kan dawnah chuan, dialysis khawl min pekte hi July 5, 2025 aia tlai lovah install ngei ngei tura tih kan ni a, install theih loh chhan chhuanlam neih a thiang tawh lo tih pawh an rawn ziak chiang bawk (document attached). Chuvangin, July 5, 2025 hma hi chuan Mamit District Hospital-ah hian dialysis khawl bun hman ngaihna a awm tawh loh avangin, district dang, khawl bun nghal theihna hmunah Mamit District Hospital tana lo tih tawh khawlte hi sawna install mai a ngai ta a ni. Hei hi Mamit District mipuite leh NGO hrang hrangte pawhin min hriatthiampui a ngai a, min hriattthiampui turin kan ngen tak meuh a ni.

Mamit District Hospital-ah hian Dialysis Centre din ngei tura hmalak zel a ni a, heta hman tur RO plant pawh Health department chuan Mamit-ah dah tawhin, reprocessor machine pawh lei mek a ni. Tin, dialysis khawl pawh hi CSR atangin dil leh nghal a ni. Mamit District Hospital lam inpeih hunah Dialysis khawl bun nghal thei turin tun atang hian inbuatsaih mek a ni.