Mission Indradhanush phase 3 round I chu 7th April 2016 atang khan India ram district hrang hrang ah tan niin, Lawngtlai district ah pawh he Missions hi kalpui a ni a, Round I & II chu nikum lam khan neih lo ni tawhin tuna mi hi a chhunzawm zelna a ni.

He Missions in a tum ber chu hmun kilkhawr zawka naupang leh nu, naupai mek ten vaccine hrang hrangte awlsam taka an lak theihna tura ruahmanna a ni a, an khuaah ngei Health Worker te va kalin Vaccine hi an pe thin a ni. Tun tumah hian Lawngtlai District chhunga khaw 55 ah thawktute hi kalin naupang 541 leh naupai 105 te hnenah vaccine an pe a ni. Hmun thenkhatah vaccine la duh lo an la awm nual a, chungte avang chuan beisei angin a hlawhtling tawk lo niin District Immunisation Officer Dr. Zothanpari Chhakchhuak chuan a tarlang. Vaccine la duhlote chhuanlam pui ber chu ‘khawsik a siama hna kan thawk thei lo’ tih a nih thu sawiin Dr. Zothanpari Chhakchhuak chuan, Vaccine pek hnua khawsik lo awm hi kan damdawiin hna a thawk a ni tih hriatna pawimawh tak pakhat a ni ve a, nachhawkna te ei chuan ni hnih hnu velah a dam leh vek mai a, hlauh tur a awm chuang lo tih sawiin dam chhunga natna hrang hrang laka invenna tur thil pawimawh a nihna avangin Vaccine lak theuh a pawimawh thu a sawi a ni.

He mission hi thla 4 chhung-April, May, June leh July ah te neih leh tura ruahman a ni. District Level Task Force on Immunisation Chairman, Dr. A. Muthamma, IAS, Lawngtlai Bawrhsap ni bawk chuan khawtina Vaccine la tur naupang leh nu, naupai zawng zawngten kokim taka vaccine hi an lak theih nan khawtlang hruaitute, tlawmngaipawl hruaitute leh kohhran hote chu sawmin, thu belhchian dawllo leh rin thu diklo leng vel avanga Vaccine lak miin an hnar thin chu ti bo tura thawhpuiah a sawm a ni.