NLUP Implementing Board (NIB) Chairman Pu JH. Rothuama, Champhai South Bialtu MLA ni bawk chuan vawiin tlai khan Champhai Circuit House-ah District Level Committee on Afforestation and Conservation din thar chu thutkhawm vawikhatna a telpui. Hei hi NIB leh Mizoram Environment and Forest Consultative Forum (MEFCOF) ten thing leh mau leh nungcha humhalh tura thawkho tura 31.8 2015-a an lo rel tawh bawhzuina a ni.

NIB Chairman chuan MEFCOF hmalakna chu Mizoram mamawh leh NLUP in a thiltum zinga a kenn tel nia a hriat avangin Sorkar in tihpuitlin tlak leh thawhpui tha a tih vanga NLUP hmalaknaah telh a nih thu leh, District tinah pawh hemi hmalakna chak zawka kalpui anih theih nan committee din tira thupek a nih thu a sawifiah a. Ramngaw leh nung cha te humhalh a, Mizo thei rah kan neih te tipung a, tuikhur leh tuihna humhalh a tih pun chu ram hmasawnna kal zel turah pawimawh tak a tling a ni, a ti a. Pu JH Rothuama chuan kan ramngaw leh nungcha te hi kan ram ti mawi leh ti nuam tu tur, khualzin te hip theitu tur an ni a. Tlai tawh deuh mah se tun chinah chuan kan ram rohlu te humhalh tur hian kan harh thar a, kan tan tlan a ngai a ni, a ti.

Committee Chairman Champhai Bawrhsap Pu Vanlalngaihsaka chuan Champhai District-ah tui hna a kang chak hle a mithiam ten an sawi thu leh, inrenchem taka hmang leh tuinhna tipung tura hmalak anih loh chuan kan tu leh fa te tan tui tlan tur a awm tawh manglo ang tih a hlauhawm thu sawiin, ramngaw leh nungcha humhalh kawngah tangrual taka hmalak a pawimawh a tih thu a sawi a. District Level a Committee din a nih rual hian VC tin ah Village Level Committee pawh din tura hriattirna pek nghal a nih thu a tarlang a ni.

Pu V.L. Bela, President, MEFCOF Gen. Hqrs. chuan thu sawi bawkin, sorkar leh NGO-te chu inlungrual tak chungin thawhhona tha tak nrna hmalak chuan awmze nei takin hmasawnna tha tak a hmuh theih dawn a no, a ti a. Ramsa te hian mi an nel hma a, anmahni humhalhtu emaw tichereu theitu mihringah chu chu a innghat a ni. Rev. Dr. F. Sangkhuma, Vice President, MEFCOF Gen.Hqrs. chuan thu sawi bawkin, he hmalakna hi vawiina mi te tan anih rualin naktuk a kan tu leh fa te tan kan ram humhalh tumna a nih thu a sawi a ni.

He Committee hian District chhunga afforestation kalpuina hmun - "Zotheihuan" hmalakna neih theihna hmun tur thlithlaiin, helai hmun hi mipuiin an tihchereu loh nan leh an khawih danglam loh nana inhrilhhre tura hmalak dan ruahman te a ngaihtuah ang a. Sorkar scheme kal mek thenkhat ah Zotheihuan hmalakna telh dan ngaihtuah te a tel a ni.

Champhai District ah hian tun dinhmunah Zotheihuan hmun 20 chuang a awm tawh a. Vawiin NIB District Level Committee on Afforestation and Conservation-ah hian District-a Sorkar Office hotute, tlawmngai pawl hrang hrang aiawh leh thuthar lakhawmtute an tel a ni.