Vawiin hian Lawngtlai District Task Force on Mission Indradhanush chu an chairman Dr. A. Muthamma IAS, Lawngtlai bawrhsap ni bawk hovin a chamber ah Indradhanush Phase 3, round 3 kalpui dan tur relin an thu khawm.

Dr. Lalhlimpuii MBBS, MPH, Surveillance Medical Officer, NPSP in Lawngtlai District a block pali ten Mission Indradhanush hmalakna report a pe a, Phase III Round 2 ah hian kum 2 hnuailam mi 978 Vaccine pek tur an nih lain mi 299 chauh pek an ni a, Nu naupai mi 264 target siam a nih lain mi 55 hnenah Vaccine hi pek an nih thu report ah tarlan a ni.

Lawngtlai District ah hian Vaccine a tam thei ang ber pek a nih theih dan tur sawiho a ni a. Block pali ah te BDO kaihhruaina hnuaia Block Level task force din nise, Health Worker zawng zawngte training pek nise. Tin, Health Workers te chu an hnathawhna hmunah Vaccine pek ngai te zawnchhuah hna thawk tur leh an thawh that loh chuan an hna pawh tih tawp sak turin CMO in lehkha tichhuak bawk se tih a ni.

Mission Indradhanush Phase II Round 3 ah hian kum 2 hnuailam mi 978 hnenah leh Nu naupai mi 264 hnenh vaccine pek tum a ni a, heng te hi Block Level Task Force Committtee ten a monitoring hna an thawk nghal ang.