Vawiin khan Mission Organic Mizoram(MOM), Department of Agriculture bultumin Agriculture Conference Hall-ah ‘Orientation Programme of Farmers Producers Organisation’ neih a ni.
Orientation Programme Mission Organic Mizoram Director Dr. H. Saithanthluanga kaihhruaiah Agriculture Department Secretary Pu Lalhmingthanga chuan Mizoram leh hmarchhak state-te chu rannung thahna hlo pesticides leh chemical fertilizers hman tlemna hmun an nih avangin buh leh bal, thlai tharchhuahte hi ‘Organic’ tura ngaih sa (organic by default) an ni a ti a. Chuvangin Central Sawrkar pawhin North East State tinte chu organic thlai tharchhuahna hmunpuia siam turin ‘Mission Organic Value Chain Development for North Eastern Region (MOVCD-NER) Scheme’ thar chu a lo duang chhuak ta a; he Scheme hian thlai tharchhuah a nih atangin a hralhna thlengin a huam vek dawn tih a sawi. He Scheme kalpui tur chuan Loneitu Zau (Cluster) siam te, Farmers Interest Group (FIG) din leh FIG chu Farmers Producer Organisation (FPO)-a inchhunkhawm a, sumdawnna thlenpui thei tura buatsaih tum a ni a. Tun dinhmunah Farmers Interest Group (FIG) 179 lai din fel tawhin Farmers Producers Organisation (FPO) 10 din fel tawh a ni a, Mizoram Society Registration Act, 2005 hnuaiah an in-register fel vek tawh a ni. Heng FPO hnuaiah hian loneitu chhungkua 5,726 te chuan ram hectare 3,966-a zauvah hma an la mek a ni, a ti.
A sawi zelnaah Agriculture Departmenet Secretary Pu Lalhmingthanga chuan loneituin hlawkna tak tak hmu tur chuan a thar tam a pawimawh a, quality tehna hrang hrangah pawh tlemte phochhuah ai chuan bag engemaw zat lei theih tura phochhuah chuan ngaihven a hlawh zawk ngei ngei thin a ni, a ti bawk. Hei hian chiang taka a zirtir chu loneitute mimal hlawkna tur bik um lova rinawm taka an intelruh tlat a, Mizoram chhung mai ni lo, ram pawn thleng pawha tam tak zawrh chhuah tham nei tur leh lo neih/huan siam hi sumdawnna ngelnghet taka chantir turin FPO hmang hian hmalak hi a tul tawh takzet a ni, a ti a. Mission Organic Value Chain Development-ah hian loneitute mamawh hrang hrang a awm thu sawiin eichawp thar chhuaha lungawi mai lo va, hralh chhuah tham nei turin kalkhawmte a chah zui nghal bawk.
He hunah hian Director of Agriculture (Crop Husbandry) Pu J. Lalzamliana pawhin thu sawiin loneitute harsatna atanga khaichhuak turin Department chuan hma a la reng a, tunhmaa kham khawp thar, hausaa ngaih thin kha tunah chuan ni tawh lovin, hralh chhuah tur khawp neih a ngai a ni, a ti a. He programme-a thalai tam tak an lo zuang lut hi a lawmawm hle a ni, a ti bawk.
Orientation Programme-ah hian Pu Lalhmingmuana, State Coordinator, MOM chuan Power Point Presentation hmangin a zirtir a. District hrang hranga FPO hruaitute, thlai tharchhuah hralhna lam buaipuitu ‘Angel Business Promoters’, ATMA, Hoi Philoi leh MZU-a Commerce Department, Economic Department leh Management Department-a Research Scholar te an tel a. Kalphung mumal zawka loneitute/huan neitute tharchhuah leh hralhchhuah kawnga hma an sawn zel theih dan tur zirho leh sawihona hun hman a ni bawk.
