Vawiin khan Chawhhhmun High School-in Silver Jubilee an lawm a, School Education Minister Pu Lalchhandama Ralte-in a hmanpui.

Minister chuan thu sawiin Kan ram zirna hi Mission-in an an keng thin a. Hun a lo kal zela chumiin a rah chhuah ram leh hnam tana chhawr tham mi puitling hmuh tur an tam a, education-in a tum lehkhathiam te nihphung an keng chho tha hle. Sorkar hnuaia zirna a luh hnuah Education hi kan nunhonaah kan ngaih pawimawh thar a, Mission rilru nena kan kalpui thar leh a tul a ni a ti. Education chu sorkar department dang ang a ni lova, zirnaah hian kan tih fuh loh chuan kan ram tlukchhiatna tur a ni ang a ti bawk. Kan ramin a mamawh chu lehkhathiam ringawt ni lo, Pathian hre mi lehkhathiam a mamawh a ni a ti a. Ram sum leh pai dinhhmun ngaihtuah chungin sorkarin zirna atan ngaihtuahna a hmang mek a. Adhoc High School a thawkte tan pawh January 2019 atanga 7th pay an hman ve dan tur ngaihtuah anih thu a sawi bawk. School Education Dept. ah hian zirtirtu post ruak a tam hle a, Primary School-ah 1150, Middle School-ah 700 chuang, High School leh Higher Secondary School-ah te pawh thahnem tak post ruak a awm a ni a ti a. He sorkar thar hian zirna leh hriselna lam hi ngaih pawimawh hmasakah neih a tum a ni a ti bawk.    

Hun harsa tak paltlanga Aizawl tlak lam mamawh Chawlhhmun khawtlangin High School an din thei chu lawmawm a tih thu a sawi a. Tualchhung mite nena inlaichinna nei tha School a tlem tial tial laia he school-ah tualchhung mite tha thawh thahnem tak a awm chu lawmawm a tih thu a sawi bawk. School tam tak hmasawn lam pan lova tlakhniam lam pana an kal laia Chawlhhmun High School-in hmasawn lam pana a kal zel chu lawmawm a tih thu a sawi bawk.

Pu Lalduhawma MLA pawhin he hunah hian thu a sawi a. Hun harsa tak paltlanga khawtlangin High School a kalpui dan a sawi a. Zirlaite chu Lal Isua thanlen dan anga thanglian tura a duh thu a sawi a, zirna kawngah tan la sauh sauh turin a chah bawk a ni.

Chawlhhmun High School hi kum 1994 a din tan a ni a, kum 2008-ah Adhoc Grant in aid school-ah hlankai a ni a, tunah hian thawktu Headmaster leh zirtirtu 8 an awm a, zirlai 81 an awm mek a ni. Silver Jubilee lawmnaah hian zirlai leh zirtirtute bakah he school atanga zir chhuak te, lo thawk tawh te,  Chawhlhmun khawtlang hruaitute, tlawmngai pawl hrang hrang hruaitute leh nu leh pa te an tel a ni.