Tukin zing dar 8:00Am atang khan Dr.K.Beichhua, MoS i/c AH& VETY, Social Welfare etc. chuan Siaha District chhunga a Department chan te leh a ngaipawimawh zual hmun te a tlawhkual a.  Naktukah hian Sawrkar Dept leh an hmalakna tur hmun te a tlawh chhunzawm leh  dawn a ni.

Vawiin Minister Dr.Beichhua in Sawrkar office a tlawh hmasak ber chu Excise & Narcotics , Superintendent Office a ni a,  E&N staff te meeting a neihpui nghal a ni. Minister  Dr.K.Beichhua chuan fuihna thu sawiin, Chief Minister in E&N Dept enkawl turin min ring tawk a, Kan CM in Siaha pa a rintawkna hi i ti thlawn lovang u. Excise Minister hi Mamit pa a ni lo, Champhai pa a ni bawk hek lo, Siaha Pa a ni. Chuvangin Excise & Narcotics Dept neihtu  District kan ni angin, kan mawhphurhna pawh a sang hle dawn a ni. Zep thu a cheng lo,  E&N staff te hi Zu lakah kan fihlim thin loh avangin kan image pawh a mawi tawk thin lo. Mahse tun atang chuan mi ten E &N Staff te hmel an hmuh dan thlak tur hian Siaha District  atang hian bul tan kan tum tur a ni, a ti.

Minister hian AH&VETY Farm Siaha District chu a tlawh nghal a. Amah an lo lawmna programme Kaihhruaitu Dr.Sahlu Khaila,DVO chuan thu sawiin, Dr.K.Beichhua hian AH&VETY Farm hi a ngai pawimawh em em a, a MLA fund atangin Internal Road 1.8Km a thui pawh min lo siamsak tawh a. Siaha AH&Vety Office tan hian Assembly house-ah te hial a lo auchhuak tawh thin a ni, a ti.
Dr. K.Beichhua pawhin  Siaha AH& Vety Farm hi Mizoram district dang te nen khaikhin ngam lo khawpin a tla bal tawha, chuvangin thuamtha turin theitawp a  chhuah tur thu sawiin, Aizawl a thlen thlak ve leh Bawng In Sakna tur Work order a chhuah nghal tur thu  sawiin, hmanni lawka MPSC kaltlang Vety Doctor 2  lak te zinga pakhat pawh Siaha a awm tura order siam tawh a ni thu a sawilang bawk.

MADC AH&Vety Farm pawh Minister hian an EM(Vety) sawmna angin tlawhin, Bawng chi tha mi 5 a pek tur thu a sawi bawk.

Distril Jail pawh tlawhin, tunah hian Jail inmates 71 an awm mek a ni. Jail Superintendent Pu Laldingliana Chinzah chuan Minister hi Jail dinhmun hrechiangtu leh vei em em tu a ni a. A MLA fund atangin Tui connection 5 lai a lo siam sak tawh a, MLA a nih lai pawh khan Jail  a tlawh thin thu leh District Jail a chhiat tawh thu Session-ah pawh a lo aupui nasa tawh a ni, a ti.

Minister chuan District Jail hi 1978 atang khan vawiin thlengin a building leh engkim mai hi a la ngai reng a ni, a ti a. A building kan la siam theih loh pawhin a fencing tal hi siam vat dan kawng ka lo  dap dawn ni a, a ti. Minister hian inmates ho tuk khat chawhmeh leina tur Rs.5000/- a pe bawk.

Sericulture Dept Farm pawh Minister hian a tlawh bawk.

Dr.K.Beichhua hian  Maraland Gospel Centenary Hospital pawh a tlawh nghal bawk.

Minister hian a pianna khua Thosai khua pawh tlawhin, Thosai khaw mipui ten  Minister hi Ruai nen ropui takin an lo hmuak bawk a ni.

Dr.K.Beichhua hi kum term tam tak  MTP(H) President lo nih tawh a ni a. vawiin tlaiah MTP(H) office-ah MTP(H) hruaitute nen inkawmna hun neihin, amah puala MTP(H) in chawhlui a buatsaih sak chu an kil ho nghal a ni.