Vawiin khan School Education Minister Pu Lalchhandama Ralte chuan Khawzawl leh Chalrang khuaah School a tlawh.

Minister chuan Presbyterian English School Khawzawl Vengthar a tlawh a, zirlaite leh zirtirtute hmaah thusawiin zirna hi Mission lamah let leh se, ram leh hnam kal zel tur atan zirna hi mission rilru pu chunga kalpui a ngai a ni a ti. Sorkarin mission nen zirnaah thawhho a duh a, chuvang chuan tun hnaiah pawh Aizawl-a Sikul sen an tih thin chu sorkarin Synod kuta  hlan let leh turin thutlukna a siam a ni a ti. Sorkarin a enkawl theih loh lam a ni lova, Pathian hre chunga naupangten thiamna an neih hi a duh zawk a ni a ti. PES Khawzawl Vengtharin naupang 600 chuang an nei thei a,  HSLC-ah result tha tak an nei thin chu lawmawm a tih thu a sawi bawk.
    
Tukin vek khan Hermon High School pawh a tlawh a, khawtlang din private an nih avangin theih tawpa tan la sauh sauh tur leh naupang pawh tun aia tam hip khawm thei tura tan la turin a fuih a ni.
    
Minister hian Chawngtlai a panna kawngah Chawngtlang a tlawh a, khawtlang hruaitute leh zirtirtu amah lo dawngsawngtute hmaah thu a sawi a. Pu Lalchhandama Ralte chuan sorkar tharin khawtlang thatna atan zu khapna dan a siam a, thisen man tihbo a ni a, school timing thlak a ni a, inkal pawhna kawng Zoram hmun hrang hrangah siam mek a ni a, SEDP pawh hman theih thuai beisei a ni a ti.

Minister hian Chalrang Middle School pawh a tlawh a, zirtirtu leh khawtlang hruaitute hmaah thusawiin Minister chuan sorkarin class tin daih zirtirtu pe turin ruahmanna a kalpui mek a ni a ti a. Tun hnaia MR teacher lak turah chuan June thlaa trained chhuak turte tan pawh a dil theih dawn a ni a ti.
       
Education Minister Pu Lalchhandama Ralte hi MLA pahnih Pu Lalrinsanga Ralte leh Pu C.Lalmuanpuia leh Addl Director School Education Pu K.Laldingliana ten an tawiawm a ni.