Agriculture Technology Management Agency (ATMA), Kolasib ruahmanna in Vawiin khan Kolasib I&PR Conference Hall ah tunlaia lo nei kuthnathawk tam tak tana harsatna thlentu pangang chi khat fall armyworm chungchangah inkawmhona neih a ni.
Inkawmhona hun hi Dr.V.Zodinsanga, Project Director ATMA chuan a kaihruai a, fall armyworm chungchanga inkawmhona nei tura kalkhawm te chu lawm in Pu J Rothanga, DAO chuan thusawina hun a hmang bawk. Pu J Rothanga chuan kan tunlai khawvela sik leh sa inthlak danglam chak lutuk en hian mitin hian hemi kawngah mawhphurna kan neih tih hriat a pawimawh ani tiin ramngaw humhalh na kawngah nasa taka tan kan lak a hun a ni a ti. Ramngaw kan ti chereu nasa lutuk a, chu chuan ramsa te tan harsatna a thlen a, ram ah chaw ei tur a van avangin mihring te chenna bul hnai ah chaw leh tui zawngin an rawn chhuak a, chu chuan kawng hrang hrangin mihringte tan harsatna a thlen a, natna chi hrang hrang pawh an rawn keng tel thei a, hei hian nun hona ah beisei loh harsatna a thlen thei a ni a ti. Nungchate ti rem zawng leh Boruak tichhe lo zawnga khawsak thiam leh tum a pawimawh hle ani tiin khawvel hi kan tu leh fate tan chenna tlakah kan zuah a ngai ani a ti.
DAO chuan Fall armyworm chu kum 2015-16 chho vel khan Africa ramah hmuh anih thu a sawi a, Kum 2019 hian India chhim tawp lamah hmuh niin tun hnai chho ah Mizoram ah nasa takin a puang ani a ti. Fall Armyworm hian thlai chi hrang 80 chuang chaw a tan a ring thei a, tun dinhmunah vaimim chu a khawi chhe nasa hle a ni. Fall Armyworm chuan Lunglei District a khawih (affect) zau bera Hectare 2000 chuang a khawih a Kolasib ah thung chuan Hectare 92 vel a khawih a ni tih he hunah hian tarlan a ni. Kolasib District ah hian a tlangpui in Hactare 700-800 vel ah vaimim tuh/chin thin a ni a, tun dinhmuna in report chinah chuan khaw 17 atangin chhungkaw 443 te chuan Hectare 230 vela zau ah vaimim an tuh/ching a heng zinga hectare 92 ah fall Armyworm hian harsatna a thlen a ni chu chu za zela 40 vel (40%) a ni.
He hunah hian Kolasib District a kuthnathawk pawl hrang hrang bakah kuthnathawk thiante (Farmers friend) leh khawtlang hruaitute an kalkhawm a, fall armyworm chungchanga harsatna an tawh te leh hmalak zel dan tur kawnga an thil hriat duh te chu Agriculture lama mithiam rual kalkhawm hnathawk Officer leh KVK Scientist te nen sawi hona hun an hmang a ni.
