National Technology Day chu vawiin May ni 10, 2019 (Zirtawpni) khan Directorate of Science & Technology buatsaihin Vanapa Hall-ah hman a ni. National Technology Day tak May ni 11(Inrinni) hi Sawrkar chawlh a nih avangin vawiin May ni 10 hian hman a ni ta zawk a ni. He hunah hian Pu Lalnunmawia Chuaungo, Chief Secretary chu Khuallian niin he hun hi Dr. C. Vanlalramsanga, Secretary, Planning Dept. in a kaihruai a ni.

Khuallian Pu Lalnunmawia Chuaungo chuan, Science & Technology hnuaia hmalakna hrang hrangte chhuanawm a tih thusawiin,” Hmasawn nan sum leh pai a pawimawh rualin a resource tak tak zawk, mihringte kan pawimawh hle zawk a ni,” a ti a, kan Pi leh pu ten technology anlo hman tangkai thin tawh thu tar langin ,” Mei chhem alh nan chhemthei hman nachang an lo hre daih tawh a, keini pawhin kan nitin nun a hna kan thawhna kawngah technology hi tangkai takin a hman theih a ni,” a ti. Science zirlai kal khawmte chu, Mizoram tana mi tangkai leh chhenfakawm tak nih tum theuh turin a fuih a, an tui zawngte hai chhuak thiam tur leh an kal duhna zawngte chu an chhungte nen pawh a sawi ho thin turin a chah bawk.

Chairman Dr. Vanlalramsanga chuan mihring nun a technology pawimawh zia tar langin ,” Tunlai khawvel hmasawnna zawng zawng deuh thaw hi Technology Revolution-in a hrin chhuah a ni,” a ti a ,” Technology hi a chhe zawng leh tha zawng a hman theih tak anih avangin kan hman danah fimkhur hle a tha a ni,” a ti bawk. Dr Vanlalramsanga chuan Science & Technology hnuaiah Innovation Facility Centre (IFC) sak mek a nih thu leh Local Innovator-te tan an khawl siam chhuah duh awlsam zawka an siam chhuah theihna tur hmun a nih dawn thu a sawi bawk a ni.

He lawmna inkhawmah hian Dr. RK. Lallianthanga, Chief Scienctific Officer, Directorate of Science &Technology in report pein Science &Technology hnuaia peng hrang hrang MISTIC, MIRSAC leh Science Centre  hmalakna hrang hrangte a sawi a, Science & Technology Directorate hnuaia International Travel Support Scheme te, Scientific Research & Technological Innovation hnuaia sum lama tanpuina awm theite leh hmalakna pawimawh dang dang a sawi lang bawk. Dr. RK Lallianthanga chuan tun hnaia MIRSAC-in Chief Minister Award for Excellence in Public Administration a Pahnihna lawman  an dawn chu thawktute inlungrualna leh taima taka an thawh rah a ni a ti bawk.

National Technology Day 2019 hmannaah hian Science & Technology hnuaia MISTIC, MIRSAC leh Science Centre Governing Body leh Executive Body member te, Science leh Technology hmasawn nana pawl hrang hrang, Mizoram Science Society (MSS), Science Teachers’ Association, Mizoram (STAM), Mizo Academy of Sciences (MAS), Mizoram Mathematics Society (MMS), Biodiversity and Nature Conservation Network (BIOCONE), Geological Society of Mizoram (GSM) bakah sawrkar technical department atanga mi pawimawh hrang hrang leh Synod HSS, Govt. KM HSS, Greenland HSS, Home Mission School, Govt. Chaltlang HSS, Govt. Zemabawk HSS, Govt. HSS leh Govt. Republic HSS science zirlai leh zirtirtuten he hun hi an hmanpui a ni.

National Technology Day hi kum 1998-a India-in ama kutchhuak technology khawvel hriata a phochhuah Ni a ni a. India ram chu Nuclear siam thei ram a nih zia lan tir nan Rajasthan a Pokran-ah Nuclear hlawhtling takin a enchhin a, ‘Trisul’ Missile hawhtling takin a enchhin bawk a ni. Thlawhtheihna ‘Hansa-3’ an vuah chu he mi ni hian hlawtling takin a thlawh tir bawk a, Kum 1999 atang khan kum tin ram hmasawnna atana technology pawimawhna inhrilhhriatna leh inzirtirna hun atan he Ni hi hman thin a ni.

Mizoramah pawh kum engemawzat kalta atang khan National Technology Day hi hman alo ni ve ta a, Zirlaite technology hnathawh atak a zirpuina hun atan te pawh lo hman tawh thin a ni a, Tun kum thum kalta atang khan he ni hi awmze nei leh changtlung zawkin hmanchhoh a lo ni ta ziah a ni.