Mizoram Secondary School Teachers Association chuan vawiin  khan School Education Minister Pu H.Rohluna chu a Office chamber-ah hmuin School timing sawn chungchanga sorkar thutlukna tha an tih thu an sawi.

Pu H.Rohluna chuan Chief Minister-in zirna a ngaih pawimawh avangin a tih theih chian apiang a tihsak zel tih a sawi a. RMSA, SSA leh Mid-day meal a State matching share atan vaibelchhe 10 chu tun hnaiah tihfel a ni tih a sawi. School timing sawn chungchang sawiin Minister chuan  School timing sawn hi  kan hnam nun tana tha tur anih avangin cabinet-in a pawmpui a ni a ti a. Keini aia darkar khata Ni chhuak tlaite pawhin school hi an tan hma a, an thawh chhuah hmaa an thawh tam avangin an thawk hlawk nge nge a, keini pawh kan thawh hlawk phah beisei a ni a ti bawk.

Minister tawiawmtu Parliamentary Secretary Pu Joseph Lalhimpuia chuan Education avanga ramin hma a sawnna hi zaa 70/80 a ni pha a ni, a ti a. Chumi rual chiah chuan zirtirtu pahnih khat lek awm dan dik lovin zirtirtu hmel a ti bal thin a ti bawk. Inspection hi department chak lohna a ni a, tunah hian nasa takin tan lak niin, sum leh pai duh ang nei lo mah se a theih ang angin  Officer-ten an kalpui a, mipui hriat vak lohin tunah hian Inspection neiin an fehchhuak nasa ta hle a ni a ti bawk. High School-a Subject wise teacher lakna tur RR pawh buaipui mek a ni a ti a. ECCE kum thar atangin kalpui a ni dawn a, hemi hmang hian Primary ah enrolment an neih tam a beisei thu a sawi bawk.

MISSTA Office Bearer te chuan Minister leh Parliamentary Secretary te chu zirna kawnga an hmalakna chi hrang hrangte tha an tih thu leh beiseina sang tak an neih thu an sawi a. Kawng thenkhatah phei chuan an beisei aia sangin an kal niin an sawi. MISSTA OB te chuan Mizoram Education Service Rules law-a vet tura kalpui mek te, Selection Grade leh senior grade a teacher engemawzat hlankai an ni te, kumdanga an la neih ngai loh kumin February thla thleng hlawh tur LOC an nei thei te, kawng hrang hranga School Education Dept. in a mamawh infrastructure buaipui mek a ni ta te chu lawmawm an tih thu an sawi a. Chief Minister Relief fund atan cheng singkhat chu Minister kutah an hlan nghal.

MISSTA OB te hi an President Pu K.Zatlunga’n a ho a ni.