1260/2026-2027

Aizawl, 2.7.2026: Vawiin khan Mizoram Science, Technology & Innovation (MISTIC), Directorate Of Science & Technology leh National Innovation Foundation (NIF) tangkawp chuan a tum thumna atan Innovation Facility Centre(IFC), MINECO-ah tualchhung Zopa tualchher thiamte khawl siamchhuahte sem chhuahna hun an hmang.

Mizoram-ah hian Zopa tualchher thiam (Grassroot innovator) kan tihte hi mi 50 chuang awmin, anni hian an hmanraw hmuhtheih leh tualchhung mamawh milin mipuite harsatna eng emaw zat an lo sutkiansak thin tawh a, MISTIC hian Innovation Facility Centre leh Patent Information Centre kal tlangin Innovation lamah hian hma nasa taka lain NITI Aayog 2025 Report-ah hialte pawh IFC hi a lo lang ve tawh a ni.

NIF hi Department of Science and Technology, GoI hnuai autonomous institution niin Innovation-in hma a sawn theihna tura India ram pum huapa hma la tu a ni a. MISTIC hi Mizoram sawrkar hnuaia Science, Technology leh Innovation lamin hma a sawn theihna tur Central rawtna anga Mizoram sawrkarin a din a ni bawk.

Tun tuma beneficiary 30 te hnena khawl semchhuah niin, zopa tualchher thiam heng –

(i) Ramdinmawia (Haulawng) – Hmarcha chi leh a kawr thliarna
(ii) Lalhruaitluanga (Serchhip)- Changel channa
(iii) Lalbiakzuala Ralte (Luangmual) - Kuhva kawrpui leh a thel faina
(iv) Lalthafela( Kawnpui )- Kuhva thelfaina

te kutchhuak a ni hlawm a. Heng khawlte hi a thlawna dawn ni mahse a hmangtu turte leh NIF/MISTIC ten inremna ziakin an khawl dawn hi tangkai taka hmanga, a hun taka review/feedback pe tura intiamkamna siam a ni.

Vawiin khawl semchhuahna hunah hian Er. K. Lalrammuana, CSO & Member Secretary, MISTIC, DST chu chairman niin khawl dawngtu te chu an khawl dawnte tangkai taka hmang tur leh feedback/review pawh a hun taka pe turin a ngen a ni.