Cotton College, Guwahati-a Botanical Hobby Centre leh Pachhunga University College -a Botany Department te nena tang ho a Mizoram Council of Science & Technology in an huaihawt Thil nung te tak te te, nunna nei si mit lawnga hmuh tham loh microorganism an tih zirchianna ni hnih awh ‘State Level Orientation Workshop on Micro-Organisms: Let us observe and learn’ chu vawin khan Mizoram sorkar-a Chief Scientific Officer, Dr. Vanlalzara’n khuallian niin a khar. Kharna inkhawm Pachhunga University College a Life Science Seminar Hall-a neihah Dr. Vanlalzara chuan khawvelah hian thilnung tinreng kan cheng khat tlat a, a then tangkai tak an nih lain thenkhat erawh natna hlauhawm thlen thei an ni a, chung thilnung mit lawnga hmuh tham loh hriat chian lehzual chu mihring hriselna kawnga hmasawnna tur hnuk pawimawh a nih thu a sawi.

Sawrkar laipui a Science & Technology tanpuina a neih he Workshop ah hian Cotton College, Guwhati a mithiam bik ten zirtirna an pe a, University, College leh Higher Secondary School atanga zirtirtu thlanchhuah bik ten Laboratory-ah atak ngeiin zirchianna an nei a, Microorganisms zirchianna hmanrua Kit; a bik taka duan a thlawna sem a ni bawk.