Vawiin khan Pu Lal Thanzara, Parliamentary Secretary to Chief Minister chuan Springdale School Chanmari West in an sikul kum sawm tlin lawmna programme, Chanmari YMA Hall-a an buatsaih chu khualzahawm niin a hmanpui.

Pu Lal Thanzara chuan zirlai naupang te chu Pathian tihna leh amah hre reng chunga an zir lai kawngzawh turin a fuih a, zuk leh hmuam ah te fihlim turin, nungchang uluk a, aia upa te zah thiam turin a chah bawk a. Hmasawnna tam tak, a bikin internet te hi a tha zawnga hmang a, mahni zirlai leh nunah a tha lam chiah seng tura heng hmasawnna thil te hi hman tangkai thiama tul thu zirlai naupang te hi a hrilh a.

Parliamentary Secretary chuan sikul zirtirtute chu Pathian kaihhruaina nen naupang an enkawl chuan an hlawhtling ngei a rin thu sawiin naupang te tan malsawmna ni tur leh nun kawng dik kawhhmuhtu ni turin a chah nghal a ni. Parliamentary Secretary chuan Zirna in tha tak leh zirna tha neih theihna tura Sorkar-in a din Education Reforms Commission in rawtna a siamte chu a umzui theih ang ang Sawrkarin a umzui mek thu sawiin NIT leh IIMC anga zirna in tha Aizawl ah ngei din a ni ta te hian Mizo zirlai te hmabak a tih en ngei a beisei thu a sawi bawk. Sawrkar-in zirlai naupangte hamthatna turin hmachhawp tam tak rawn dah mahse in nungchang in a zir lo chuan a hlawkna kan tel thei dawn lo a ni tiin naupang te chu an nungchanga hmasawnna thil tam tak, a tha lam leh an nuna an tangkai pui theih chin chiah seng lut turin a chah a ni.

Springdale School hi kum 2002 khan din niin Nursery atangin Pawl 10 thleng an nei a. Tunah hian zirtirtu 18 in zirlai naupang 400 vel an enkawl mek a ni. Programme ah hian khawtlang hruaitute, zirlai nu leh pa thahnem tak bakah sikul zirlai zawng zawng te an tel a ni.